На жаль, нягледзячы на ўрокі Другой сусветнай вайны, спакайней на планеце не становіцца. Эскалацыя напружанасці, палітычная рыторыка за рамкамі дыпламатыі, нарастанне ваеннай актыўнасці. І вось на такім фоне ў гэтыя дні праходзіць Генеральная асамблея ААН у Нью-Ёрку. Нашу краіну прадстаўляе міністр замежных спраў. Выступаючы з высокай трыбуны, Уладзімір Макей падкрэсліў: Беларусь неаднаразова прапаноўвала і прапаноўвае шляхі рашэння глабальных праблем і пацвярджае сваю гатовасць стаць пляцоўкай для іх урэгулявання.
Пра геапалітычнае становішча, а таксама пра роль ААН у сучасных рэаліях ішла размова і падчас сустрэч Уладзіміра Макея са старшынёй 72-й Генасамблеі ААН. Міраслаў Лайчак высока ацаніў уклад нашай краіны ў дзейнасць арганізацыі і заявіў пра гатовасць садзейнічаць распрацоўцы платформы супрацоўніцтва з дзяржавамі з сярэднім узроўнем прыбытку. На палях сесіі адбылася і сустрэча Уладзіміра Макея з выканаўчым дырэктарам Дзіцячага фонду ААН ЮНІСЕФ Энтані Лейкам. Кіраўнік ЮНІСЕФ атрымаў запрашэнне наведаць Беларусь. На сустрэчы з кіраўніком алжырскага МЗС Уладзімір Макей падкрэсліў неабходнасць пашырэння гандлёва-эканамічнага супрацоўніцтва. Таксама адбыліся перамовы з міністрам замежных спраў Сірыі. Тут прагучалі словы асаблівай падзякі нашай краіне за супрацоўніцтва ў гуманітарнай сферы. З ініцыятывы паўночнакарэйскага боку прайшла сустрэча з міністрам замежных спраў КНДР. У рабочым графіку Уладзіміра Макея і сустрэча з Нехеміяй Перэсам - сынам былога прэзідэнта Ізраіля, лаўрэата Нобелеўскай прэміі, выхадца Беларусі Шымона Перэса. Сын прэзентаваў аўтабіяграфію бацькі.
72-я Генеральная асамблея ААН працягваецца. Як адзначаюць эксперты, яшчэ ніколі яна не праходзіла ў такіх складаных геапалітычных умовах.