У Доме ўрада пачалося другое пасяджэнне ніжняй палаты парламента Беларусі. Дэпутаты выбіраюць віцэ-спікера і кіраўнікоў пастаянных камісій. Іх сфарміравана 14, як і ў папярэднім скліканні.
На сувязь са студыяй выходзіць Вольга Анішчанка.
Сёння Авальная зала Дома ўрада пасля зусім невялікага перапынку зноў поўная. Але ў рабочым графіку дэпутатаў усё больш арганізацыйных пытанняў. Напярэдадні, нагадаем, тут абмежаваліся выбарамі толькі кіраўніка ніжняй палаты парламента: крэсла захаваў Уладзімір Андрэйчанка. А сёння дэпутаты выбіраюць, па сутнасці, другога чалавека ў Палаце прадстаўнікоў - віцэ-спікера. Экс-намстаршыні Віктара Гумінскага ў новым складзе парламента няма, а таму было зразумела, што гэтыя функцыі зараз будзе выконваць новы дэпутат.
Да гэтага моманту галасаванне завяршылася. Віцэ-спікерам абралі Баляслава Пірштука.
Таксама сёння тут размяркоўваюць дэпутацкія партфелі. У парламенце 14 профільных камісій. Іх колькасць, дарэчы, засталася нязменнай. Дык вось, дэпутаты галасуюць, у якой з камісій, у якім кірунку яны будуць працаваць наступныя 4 гады. Адказваць за міжнароднае супрацоўніцтва, курыраваць эканамічную палітыку, вырашаць пытанні спорту, моладзевай або сямейнай палітыкі і г.д. Зразумела, тут улічваюць першым чынам мінулыя прафесійныя заслугі.
Галасаванне зараз у самым разгары. Ужо зусім хутка стануць вядомыя імёны ўсіх кіраўнікоў камісій. І вось тады пачнецца ўжо больш мэтанакіраваная праца новага дэпутацкага корпусу. Раней тут вызначыліся з асноўнымі кірункамі. Дэпутаты гаварылі і аб развіцці экспарту, прыцягненні інвестыцый, паніжэнні крэдытнай нагрузкі для рэальнага сектара. Чакаецца, што ўсе гэтыя задачы замацуюць заканатворчасцю. За гэтае скліканне збіраюцца прыняць каля 50 новых законаў.
