Лідзія Ярмошына ў лічбах агучыла тэндэнцыі электаральнай кампаніі. Яна атрымалася адной з самых яркіх і адкрытых у нашай гісторыі. Міжнародныя назіральнікі ацанілі высокую арганізацыю. А за ходам выбараў сачылі і еўрапейцы, і Шанхайская арганізацыя супрацоўніцтва, і місія СНД.
Упершыню кожны з заканадаўцаў (а гэта 110 дэпутатаў) быў вызначаны на небезальтэрнатуўнай аснове. У парламент прайшлі палітычныя партыі і рухі, якія раней там не былі прадстаўленыя. Таму ў Авальнай зале прагучаць розныя пункты гледжання па кожным пытанні.
Новы склад парламента будзе і самым маладым. Сярэдні ўзрост дэпутатаў - ледзь больш як 49 гадоў. І ўсе з вышэйшай адукацыяй. У галасаванні прынялі ўдзел амаль 75% выбаршчыкаў. На выбары прыйшлі 5 мільёнаў 215 тысяч 359 чалавек. Прычым з іх каля 4 тысяч выбаршчыкаў так і не апусцілі бюлетэні ва ўрны для галасавання.
Адзнаку ў графе "супраць усіх" паставіла 491 тысяча 956 беларусаў - гэта амаль 10%. Прызнаныя сапсаванымі больш за 65 з паловай тысяч бюлетэняў. З 6 па 15 верасня ў ЦВК паступіла 479 зваротаў, гэта на дзве сотні менш, чым падчас парламенцкай кампаніі 2012 года. Шматлікія з іх не звязаныя з правядзеннем выбараў, а, хутчэй, датычацца растлумачэння выбарчага заканадаўства.
Аб тым, што выбарчая кампанія - 2016 атрымалася адной з самых яркіх і адкрытых - гавораць і эксперты. Інакш і быць не магло - канкурэнцыя - больш за 4 чалавекі на месца. Конкурс - годны любой прэстыжнай ВНУ. Зрэшты, яркасць і адкрытасць зусім не перашкодзілі выбарам у парламент стаць і выдатна арганізаванымі. Наогул, правядзенне такой кампаніі - гэта каласальная праца, ад падрыхтоўкі нарматыўнай базы і да друкавання бюлетэняў. У вялікай палітыцы дробязяў не бывае.
