У Санкт-Пецярбургу пачынае работу Міжпарламенцкая Асамблея СНД

Міжнароднае супрацоўніцтва, эканоміка і пытанні бяспекі. Сёння ў Санкт-Пецярбургу пачынае работу Міжпарламенцкая Асамблея СНД. У Таўрычаскім палацы збяруцца сотні парламентарыяў з краін Садружнасці. Якія пытанні будуць абмяркоўваць у Паўночнай сталіцы Расіі? Падрабязнасці ў Дар'і Белавусавай-Пятроўскай.

Месцам сустрэчы парламентарыяў не выпадкова выбраны Таўрычаскі палац. Менавіта тут знаходзіцца штаб-кватэра Міжпарламенцкай Асамблеі СНД. Мерапрыемства праходзіць ужо 49 раз, і сёння за сталом перамоў збяруцца кіраўнікі парламентаў і дэлегацыі з дзевяці краін. Гэта Азербайджан, Арменія, Беларусь, Казахстан, Кыргызстан, Малдова, Расія, Таджыкістан і Узбекістан.

Старт дасць канферэнцыя па процідзеянні міжнароднаму тэрарызму. Сёння поспех контртэрарыстычнай работы напрамую залежыць ад узаемадзеяння парламентаў. Такое супрацоўніцтва дазваляе больш эфектыўна змагацца з рознымі праявамі экстрэмізму. Таксама абмяркуюць пытанні інфармацыйнай бяспекі, барацьбы з нелегальнай міграцыяй, гандлем людзьмі і незаконным абаротам наркотыкаў. Тут вялікую ролю адыгрывае міжнароднае супрацоўніцтва. Так, дзякуючы аперацыі "Канал", у якой удзельнічаюць больш за 20 краін, штогод з абароту ўдаецца канфіскоўваць тоны наркатычных сродкаў. Яшчэ адна важная тэма дыскусій - процідзеянне міжнароднаму тэрарызму. 

На Міжпарламенцкай Асамблеі СНД удзельнікі абмяркуюць 11 мадэльных законапраектаў. Яны датычацца прававых пытанняў, эканомікі і фінансаў. У прыватнасці, будуць гаварыць аб цэнаўтварэнні і Падатковым кодэксе для дзяржаў Садружнасці.

Тэмай дыскусіі стане і моладзевае супрацоўніцтва ў краінах Садружнасці. Гэта датычыцца сумесных адукацыйных праектаў і абмену студэнтамі. Таксама абмяркуюць праграму і тэмы VI Форуму рэгіёнаў Беларусі і Расіі. Ён пройдзе сёлета ў ліпені ў Санкт-Пецярбургу.