Галасуюць сёння беларусы і за мяжой. У 36 краінах працуюць 47 участкаў. Больш за ўсё іх у Расіі. На сувязі са студыяй зноў наш уласны карэспандэнт у Маскве Дар'я Белавусава-Пятроўская.
Актыўнасць выбаршчыкаў бліжэй да 12 гадзін дня павялічылася. Сюды, на ўчастак для галасавання № 740, які знаходзіцца ў дзелавым і культурным цэнтры пасольства Беларусі ў Маскве, прыходзяць дыпламаты, саветнікі і проста работнікі пасольства, супрацоўнікі беларускіх прадпрыемстваў, якія працуюць на тэрыторыі Расіі, а таксама прадстаўнікі беларускай дыяспары.
Сёння, у асноўны дзень галасавання, першым свой выбар зрабіў кіраўнік дыпмісіі. Пасол Беларусі прыйшоў на выбарчы ўчастак прама да адкрыцця, у 8 раніцы. Як растлумачыў дыпламат, сёння для пасольства вельмі адказны і напружаны дзень, таму вырашыў прагаласаваць так рана.
Галасаванне ў пасольстве праходзіць па двух спісах - асноўным і дадатковым. У першы ўваходзяць больш за тысячу чалавек. Гэта непасрэдна супрацоўнікі пасольства і ўсе тыя, хто загадзя паведаміў, што прыйдзе на выбары. Другі спіс фарміруецца прама на месцы. Гэта людзі, якія вырашылі прагаласаваць незапланавана. Напрыклад, нашы суайчыннікі, якія сёння аказаліся ў Маскве ў камандзіроўцы або проста прыехалі адпачыць на выхадныя.
Юрый Ярашэвіч, старшыня камісіі выбарчага ўчастка № 740 г. Масквы: "Датэрмінова прагаласавала 20 %. Яўка высокая".
Выбарчы ўчастак будзе працаваць да васьмі вечара. Потым у прысутнасці назіральнікаў і членаў выбарчай камісіі ўрны з датэрміновага і асноўнага галасавання адкрыюць, пачнецца падлік галасоў. Канчатковыя звесткі перадаюць у Мінск, у МЗС Беларусі.
