Удзельнікі сённяшняга пасяджэння трохбаковай кантактнай групы выказалі прыхільнасць да захавання так званага "хлебнага перамір'я". Дыпламаты канстатавалі істотнае паніжэнне ліку выпадкаў прымянення агнястрэльнай зброі на лініі судатыкненння.
Марцін Сайдзік, спецпрадстаўнік АБСЕ у трохбаковай кантактнай групе: "Гэта перамір'е працягвае быць асноўным чаканнем грамадзянскага насельніцтва ў зоне канфлікту. У гэтай сувязі бакі пацвярджаюць сваю прыхільнасць працягу "хлебнага перамір'я", неабходнага для жыццезабеспячэння, у тым ліку, на перыяд правядзення палявых прац. Я спадзяюся, што лідары краін нармандскага фармату знойдуць магчымасць падтрымаць гэта рашэнне падчас перамоў у Гамбургу".
Так званае "хлебнае перамір'е" ўступіла ў сілу напрыканцы чэрвеня і будзе дзейнічаць да канца жніўня. Яго галоўная мэта - палегчыць уборку зерневых на ўсходзе Украіны. Аднак перагаворшчыкі выступаюць за тое, каб перамір'е было працягнута і пасля завяршэння ўборачнай кампаніі. Дарэчы, цяперашняя сустрэча ў Мінску атрымалася даволі прадуктыўнай. Нягледзячы на гарачыя спрэчкі, бакам удалося завяршыць працэс удакладнення спісаў асоб, якія ўтрымліваюцца. Гэта дазволіць Кіеву і непрызнаным рэспублікам пачаць працэс абмену палоннымі па формуле "ўсіх на ўсіх". Таксама, згодна са словамі Марціна Сайдзіка, у выніку працы кантактнай групы ўдалося наладзіць бесперабойную дастаўку вады ў зону канфлікту на Данбасе. А сёння ў Мінску апаненты, нарэшце, дамовіліся аб механізме аплаты за яе. Гэта, як чакаецца, выключыць верагоднасць спынення паставак.
На выніковай прэс-канферэнцыі спецпрадстаўнік АБСЕ звярнуўся да ўдзельнікаў Парламенцкай асамблеі гэтай арганізацыі, якая праходзіць у Мінску, з заявай аб важнасці мінскага фармату.
Марцін Сайдзік, спецпрадстаўнік АБСЕ у трохбаковай кантактнай групе: "Я думаю, што важна паказаць і ўдзельнікам Парламенцкай асамблеі, што мінскіх механізм працягвае працаваць, што мы тут працягваем шукаць рашэнне праблемы на ўсходзе Украіны. Я думаю і спадзяюся, што ўдзельнікі Асамблеі гэта прымуць да ўвагі і ўлічаць".
Нагадаем, акрамя абмену палоннымі, мінскія пагадненні прадугледжваюць поўнае спыненне агню і адвядзенне цяжкіх узбраенняў ад лініі судатыкнення, а таксама наданне асобным раёнам Данбаса асаблівага статусу і аднаўленне Украінай кантролю над сваёй мяжой у зоне канфлікту. Наступнае пасяджэнне кантактнай групы адбудзецца ў Мінску праз два тыдні.
