Пачнем з галоўнай палітычнай падзеі дня: сёння ў Мінск з афіцыйным візітам прыбыў прэм'ер-міністр Пакістана. Візіт у адказ, паколькі запрашэнне наведаць нашу краіну Наваз Шарыф, нагадаем, атрымаў ад Прэзідэнта Беларусі ў маі, калі Аляксандр Лукашэнка наведваў Ісламабад. Госць не прымусіў сябе чакаць доўга, што падкрэслівае асаблівую цікавасць Пакістана да нашай краіны. У знак глыбокай павагі і сяброўства прэм'ер-міністра і яго жонку сустракаў ля трапа асабіста Кіраўнік дзяржавы. Сёння ў Палацы Незалежнасці Аляксандр Лукашэнка і Наваз Шарыф правялі перамовы: спачатку ў вузкім складзе, а затым з удзелам дэлегацый. Па выніках афіцыйных сустрэч падпісана 14 дакументаў. Найважнейшы з іх - дагавор аб сяброўстве і супрацоўніцтве паміж краінамі.
Гэты дакумент змацавалі подпісамі асабіста Аляксандр Лукашэнка і Наваз Шарыф. Храналогія дня - у Аляксея Адашкіна.
Крыху больш за два месяцы таму адбыўся афіцыйны візіт Прэзідэнта Беларусі ў Краіну чыстых - менавіта так перакладаецца назва Пакістана. Як адзначаюць эксперты, супрацоўніцтва Ісламабада з Мінскам незаслужана доўга знаходзілася ў рэжыме чакання. Аднак ужо зараз прыкметна паскарэнне двухбаковых адносін на ўсіх узроўнях. Мінулай восенню ў Пакістане адкрылася беларускае пасольства, далей было наведванне гэтай краіны Аляксандрам Лукашэнкам з вялікай дэлегацыяй міністраў, кіраўнікоў буйных дзяржаўных і прыватных структур і прадпрымальнікаў. Вынікам перамоў стала падпісанне партфеля кантрактаў больш як на 50 мільёнаў долараў. Гэтая лічба толькі крыху меншая за леташні тавараабарот паміж дзвюма дзяржавамі.
І вось ужо ў Нацыянальны аэрапорт Мінск прыбывае спецрэйс з Ісламскай Рэспублікі Пакістан. На борце - прэм'ер-міністр Мухамад Наваз Шарыф з жонкай. У Пакістане гэта самы аўтарытэтны і ўплывовы палітык, які ўжо трэці раз займае пасаду кіраўніка ўрада. Такі хуткі візіт у адказ сведчыць пра высокую зацікаўленасць у супрацоўніцтве з нашай краінай. На парадку дня вялікі спіс перспектыўных планаў па пашырэнні ўзаемадзеяння. Кіраўніка ўрада Пакістана ў аэрапорце асабіста сустракае Прэзідэнт Беларусі - гэты сімвалічны жэст можна разглядаць як даніну глыбокай пашаны, прызнання і сяброўства. Яшчэ адзін знак, які кажа пра тое, якое значэнне гэтаму візіту надаюць бакі.
Яшчэ больш урачыстая цырымонія прывітання Наваза Шарыфа адбылася ўжо ў Палацы Незалежнасці. Усё прайшло ў строгай адпаведнасці з пратаколам сустрэчы высокага госця. Спачатку прагучалі паслядоўна гімны дзвюх краін, пасля гэтага прайшла маршам рота ганаровай варты.
У танальнасці сустрэчы Аляксандра Лукашэнкі і Наваза Шарыфа было прыкметна, што абодва палітыкі настроеныя вельмі па-сяброўску ў дачыненні адзін да аднаго. А ў Пакістане, як і ў Беларусі, добрыя асабістыя адносіны паміж палітыкамі працуюць як моцныя каталізатары і для міждзяржаўных сувязяў.
Пакістан - шостая па насельніцтве краіна ў свеце. Па гэтым паказчыку яна пераўзыходзіць Беларусь амаль у 20 разоў. Ядзерная дзяржава з багатымі чалавечымі рэсурсамі і амбіцыйнымі планамі па актывізацыі эканамічнага росту ўяўляе сабою перспектыўнага партнёра для Беларусі. Пакістан займае сёмае месца на планеце па экспарце сельскагаспадарчай прадукцыі. Для беларускіх машынабудаўнікоў гэтая краіна з'яўляецца адным з ключавых рынкаў збыту трактароў па-за СНД. І ўжо сёлета МТЗ плануе на траціну павялічыць продажы тэхнікі ў Пакістан. Абноўленая лічба - 4 000 адзінак.
Пастаўкі трактароў у Пакістан адкрываюць у Паўднёвую Азію і шлях для айчынных вытворцаў покрывак. "Белшына" з 2001 года экспартуе ў Пакістан сваю прадукцыю. Аб'ёмы штогод растуць. Толькі сёлета продажы на гэты рынак могуць прынесці бабруйскаму прадпрыемству два з паловай мільёны долараў. Зараз абмяркоўваецца магчымасць паставак і новых тыпаў шын для грузавога аўтатранспарту.
Створаная ўсяго толькі за год дагаворна-прававая база паміж нашымі краінамі дазваляе весці супрацоўніцтва па ўсіх без выключэння кірунках - ад палітыкі, эканомікі да навукі, адукацыі і культуры. Падчас візіту Прэзідэнта Лукашэнкі ў Пакістан у маі была падпісаная Ісламабадская дэкларацыя беларуска-пакістанскага партнёрства. Візіт у адказ Наваза Шарыфа дапаўняе і замацоўвае ўсё тое, пра што бакі дамовіліся ўвесну. Менавіта сустрэчы на такім узроўні ствараюць трывалы падмурак для ўсяго спектру міждзяржаўных адносін.
Дарэчы, як распавёў Наваз Шарыф, да прыезду ў Беларусь ён за месяц правёў тры ўрадавыя нарады. На гэтых сустрэчах дэталёва абмяркоўваліся пытанні беларуска-пакістанскіх адносін. Гэта можна расцэньваць як доказ сур'ёзнасці намераў і планаў Ісламабада на стварэнне максімальна трывалых сувязяў з Мінскам.
Наваз Шарыф, прэм'ер-міністр Пакістана: "Мы ўзрушаныя гасціннасцю вашай краіны і народа. Мы таксама вельмі цёпла ўспрымаем ваш візіт у нашу краіну, вы паклалі пачатак сяброўству паміж краінамі, і сёння мы разглядаем візіт як далейшае ўмацаванне адносін. Зараз, калі нашы адносіны становяцца мацнейшымі, трэба часцей сустракацца. Што я бачыў у Мінску? Вельмі ўражаны тым, што ўбачыў вакол, Мінск - выдатны горад. Дазвольце зрабіць камплімент, што сталіца і ўся краіна вельмі прыгожыя".
Прэзідэнт Беларусі і прэм'ер-міністр Пакістана правялі перамовы і ў вузкім складзе, і ў пашыраным. Абмяркоўвалася прапанова стварыць 3-4 сумесныя пілотныя праекты ў кожнай з краін. Беларусь будзе пашыраць вытворчасць тэхнікі ў Пакістане. А вось Пакістан зацікаўлены ў запуску тэкстыльнага прадпрыемства ў нашай краіне, якое будзе працаваць на пакістанскай сыравіне і пры гэтым пастаўляць прадукцыю на рынкі Еўрапейскага і Еўразійскага саюзаў. Акрамя таго, Аляксандр Лукашэнка і Наваз Шарыф падтрымалі ідэю стварэння груп сяброўства ў парламентах. Таксама дэталёва абмеркавалі будаўніцтва пасольстваў нашых краін у Ісламабадзе і Мінску.
Шматабяцальныя перспектывы і для супрацоўніцтва ў гуманітарнай сферы. Сёлета адбыўся абмен дэлегацыямі па лініі нацыянальных акадэмій навук. Акрамя таго, Беларусь з'яўляецца прывабнай для Пакістана краінай з пункта погляду адукацыйных паслуг. Пакістанскі камітэт па вышэйшай адукацыі мае гадавы бюджэт на 700 мільёнаў долараў, і нашы навучальныя ўстановы могуць прапанаваць якасныя паслугі па навучанні студэнтаў з гэтай краіны.
Па выніках афіцыйных сустрэч сёння было падпісана 14 дакументаў. Найважнейшы з іх - дагавор аб сяброўстве і супрацоўніцтве паміж нашымі краінамі. Гэты дакумент змацавалі подпісамі асабіста Аляксандр Лукашэнка і Наваз Шарыф. Акрамя таго, падпісаныя пагадненні аб супрацоўніцтве ў такіх сферах, як ахова здароўя, сродкі масавай інфармацыі, прыродныя рэсурсы, лясная гаспадарка, сельская гаспадарка і нават літаратура. Акрамя таго, Мінск і Ісламабад сталі гарадамі-пабрацімамі.
Ужо ўвечар на Алеі ганаровых гасцей каля Палаца Незалежнасці Наваз Шарыф на памяць пра свой візіт пасадзіў елку.
Заўтра Наваза Шарыфа чакае не меней насычаная праграма. У аўторак у Мінску з удзелам высокага госця з Ісламабада пройдзе беларуска-пакістанскі бізнес-форум. Чакаецца, што прэм'ер-міністр асабіста азнаёміцца з машынабудаўнічай вытворчасцю, правядзе шэраг афіцыйных сустрэч і выступіць з лекцыяй перад студэнтамі і выкладчыкамі Белдзяржуніверсітэта. Дарэчы, Навазу Шарыфу будзе ўручаны дыплом ганаровага прафесара БДУ - за вялікае асабістае ўкладанне ва ўмацаванне і развіццё дружалюбных адносін паміж нашымі краінамі.
