Перагледзець пазіцыю ЗША і ў дачыненні да Беларусі заклікаюць у нашым МЗС. У знешнепалітычным ведамстве сёння пракаменціравалі рашэнне Вашынгтона аб прадаўжэнні абмежавальных мер у дачыненні да беларускага боку. Падкрэсліваецца, што даныя крокі, прынятыя яшчэ ў 2006 годзе, не адпавядаюць сапраўднаму становішчу спраў паміж дзвюма краінамі.
"Беларуска-амерыканскія адносіны за гэты час істотна змяніліся. Але, як мы бачым, у некаторых пытаннях Вашынгтон, на жаль, пакуль не здольны перагледзець сваю састарэлую пазіцыю ў дачыненні да Беларусі. Усё больш абсурдна гучыць сцвярджэнне аб тым, што Беларусь, якая прыкладае ўсе намаганні для ўмацавання рэгіянальнай і міжнароднай бяспекі, можа ўяўляць для іншых дзяржаў якую-небудзь пагрозу", - заявіў намеснік начальніка ўпраўлення інфармацыі і лічбавай дыпламатыі МЗС Андрэй Шупляк, пры гэтым адзначыўшы, што беларускі бок зацікаўлены ў працягу канструктыўнага ўзаемадзеяння са Злучанымі Штатамі.
