Саміт АДКБ у Бішкеку
Лідары краін - удзельніц ваенна-палітычнага блока абмяркуюць самыя вострыя пытанні і перспектыўныя праекты. Прэзідэнт Беларусі на сесіі Савета АДКБ выскажа асноўныя прапановы нашай краіны ў галіне рэгіянальнай і міжнароднай бяспекі. Мінск таксама мае намер падтрымаць сумесную з ААН праграму па барацьбе з тэрарызмам. Пагавораць аб сітуацыі ў інфармацыйнай сферы і аб таджыкска-афганскай мяжы, дзе таксама ўсё не так спакойна.
Сустрэча прэзідэнтаў Беларусі і Кыргызстана
Такія саміты - гэта яшчэ і пляцоўка для двухбаковых сустрэч, магчымасць ацаніць стан і перспектывы адносін паміж краінамі. Аляксандр Лукашэнка правёў перамовы са сваім калегам - кіраўніком Кыргызстана Сааранбаем Жээнбекавым. Наша краіна пацвярджае гатовасць развіваць супрацоўніцтва. У гэтым плане ёсць куды імкнуцца і ў частцы павелічэння ўзаемнага гандлю, і ў рэалізацыі вызначаных праектаў. За мінулы год тавараабарот перавысіў 130 мільёнаў долараў. Аснова беларускага экспарту - трактары, лекі, малочныя і мясныя прадукты. У Кыргызстане дзейнічае больш як паўсотні прадстаўніцтваў суб'ектаў тавараправоднай сеткі і дыстрыб’ютараў беларускіх прадпрыемстваў.
Неўзабаве Беларусь і Кыргызстан абмяркуюць пункты росту свайго партнёрства. Чарговае пасяджэнне двухбаковай міжурадавай камісіі па гандлёва-эканамічным супрацоўніцтве плануецца правесці ў Мінску ўжо ў гэтую нядзелю. Нядаўна бакі дамовіліся аб тым, каб падняць узровень сустаршыняў камісіі да віцэ-прэм'ераў.
