У Палаце прадстаўнікоў і Савеце Рэспублікі далі старт вясновай сесіі. І для гэтага складу парламента яна стане своеасаблівым вынікам напярэдадні маючых адбыцца выбараў. Але перш заканадаўчая база Беларусі папоўніцца новымі дакументамі. Адзін са знакавых - ваенная дактрына. Як і ранейшая, яна будзе абарончага характару. Падрабязна пра гэта мы пагаворым крыху пазней у "Панараме". Яшчэ адно значнае пытанне - праграма ўрада на найбліжэйшыя 5 гадоў. Тут акцэнт у першую чаргу на эканоміку. У гэтым месяцы да парламента і беларускага народа звернецца са штогадовым пасланнем і Прэзідэнт. Сёння пасля адкрыцця сесіі дэпутаты прынялі некалькі міжнародных ратыфікацый. Першыя вынікі з Авальнай залы ў Святланы Лук'янюк.
Гэта сесія для 5 склікання завяршае іх парламенцкую працу. Тры месяцы на папаўненне заканадаўчай скарбонкі Беларусі. Паралельна ствараюць і зачын для дэпутатаў наступнага склікання. Ужо пачалі рыхтаваць бюджэт-2017. Абмяркоўваецца і прававое поле па еўразійскай інтэграцыі, гандлёва-эканамічныя сувязі з блізкімі і далёкімі партнёрамі, а таксама еўрапейскі вектар.
Працуючы на апярэджанне, сілавому блоку дэпутаты надаюць павышаную ўвагу. Прынятыя змяненні аб больш жорсткай крымінальнай адказнасці за стварэнне і фінансаванне экстрэмісцкіх арганізацый, удзел ва ўзброеных канфліктах у іншых краінах у якасці наёмнікаў, а таксама за выраб, захоўванне і збыт кактэйляў Молатава.
У першы рабочы дзень дэпутаты прынялі адзін са знакавых законапраектаў гэтай вясновай сесіі - "Аб ваеннай дактрыне". Гэты дакумент называюць праграмным і сучасным, папярэдні быў прыняты 14 гадоў таму. І за гэты час змяніліся і выклікі, і пагрозы, а таксама тактыка ўзброеных канфліктаў.
Новая дактрына - гэта адказы на пытанні, з якімі сутыкаюцца сёння нават самыя паспяховыя краіны, аналіз сітуацыі ў свеце, у тым ліку з-за каляровых рэвалюцый.
Андрэй Раўкоў, Міністр абароны Беларусі: "Сёння апроч класічных формаў прымянення ўзброеных сіл тыповым стала выкарыстанне стратэгіі непрамых дзеянняў. Ён прадугледжвае вядзенне ваенных дзеянняў чужымі рукамі, масавае задзейнічанне радыкальных экстрэмісцкіх тэрарыстычных арганізацый, прыватных ваенных кампаній, шырокае выкарыстанне пратэстнага патэнцыялу насельніцтва. Апошнія падзеі, звязаныя з шэрагам так званых каляровых рэвалюцый, арабскай вясной, вайной у Сірыі, сведчаць аб тым, што важная роля адводзіцца правакаванню ўнутраных узброеных канфліктаў звонку".
У ваеннай дактрыне з'явіліся такія новыя словазлучэнні, як "лакальная вайна" і "незаконнае ўзброенае фарміраванне". Але галоўнае, захоўваецца абарончы характар, порах трымаем сухім, а прымяненне ваеннай сілы - як выключная мера. Дэпутаты падтрымалі дакумент аднагалосна.
Аляксандр Мяжуеў, дэпутат Палаты прадстаўнікоў Нацыянальнага сходу Беларусі: "Уносяцца змяненні і дапаўненні для таго, каб супрацоўнікі сілавога блока, выконваючы свае абавязкі па гарантаванні нацыянальнай бяспекі, былі абаронены законам".
Міратворчую місію Беларусь пацвердзіла ўдзелам ва ўрэгуляванні ўкраінскага канфлікту. Нашы дэпутаты гатовыя працаваць з заходнімі калегамі ва ўсіх фарматах. Запланаваны візіты да нас дэлегацый Еўрапарламента, дэпутатаў Чэхіі і Японіі. Летам беларусы прымуць удзел у сесіі Парламенцкай асамблеі АБСЕ. А сёння ратыфікавалі мемарандум з гэтай структурай.
Яўген Абаленскі, старшыня Пастаяннай камісіі Палаты прадстаўнікоў Нацыянальнага сходу Беларусі: "Мы на тэрыторыі Рэспублікі Беларусь маем намер утылізаваць высокатаксічныя кампаненты вадкага ракетнага паліва. А эканамічна гэта ўсё будзе адбывацца з фінансаваннем АБСЕ".
У кулуарах Палаты прадстаўнікоў сёння актыўна абмяркоўвалі праграму сацыяльна-эканамічнага развіцця на 5 гадоў - да 2020. Гавораць, заўтра, калі будзе разглядацца дакумент, пытанняў прэм'еру нарыхтавалі шмат. І яго доўга не адпусцяць з трыбуны.
Аб пошуку новых магчымасцяў для стабільнай працы прамысловасці гаварылі сёння ў Савеце Рэспублікі. З улікам пенсіённай рэформы патрэбны новыя механізмы стварэння дадатковых рабочых месцаў, заявіў Міхаіл Мясніковіч сёння на адкрыцці сесіі. Такі падыход будзе пры разглядзе законапраекта аб занятасці. А на праблемных прадпрыемствах ужо сёння ствараюцца дэпутацкія групы.
Кіраўніцтва Савета Рэспублікі будзе садзейнічаць стварэнню сумленных прынцыпаў канкурэнцыі ў ЕАЭС, каб экспарт быў выгадны ўсім. Пакуль жа ёсць шэраг нявырашаных пытанняў. Як раз над прававым зняццем бар'ераў будуць працаваць парламентарыі. Усяго за вясновую сесію Савет Рэспублікі плануе разгледзець больш за 40 законапраектаў.
