Пра галоўную палітычную кампанію года. Сёння пачаўся новы этап выбарчага працэсу - рэгістрацыя кандыдатаў у дэпутаты Нацыянальнага сходу. Напярэдадні акруговыя выбарчыя камісіі перасталі прымаць ад іх дакументы. Праверыць інфармацыю і вызначыцца з канчатковым спісам трэба да 11 жніўня, пасля чаго стартуе самы насычаны этап перадвыбарнай гонкі - агітацыя. Якім будзе конкурс на дэпутацкае крэсла, падлічыла Вераніка Бута.
Амаль 6 чалавек на месца. Перадвыбарная гонка абяцае быць больш актыўнай, чым 4 гады таму. Праўда, наперадзе яшчэ праверка пададзеных дакументаў. Аднак нават нягледзячы на гэты факт у Цэнтрвыбаркаме мяркуюць, што выніковая лічба ўсё роўна будзе вышэйшая, і разлічваюць на конкурс крыху больш як 4 кандыдаты на дэпутацкае крэсла.
Усяго па рэспубліцы ўдзельнічаць у выбарах выказалі жаданне 630 чалавек. Самы вялікі конкурс - 6,5 кандыдата на месца - у сталіцы і ў Магілёўскай вобласці. Высокія лічбы ў Віцебскім і Гродзенскім рэгіёнах. Менш за ўсё канкурэнцыя адчуваецца на Гомельшчыне, аднак і там конкурс вышэйшы за сярэдні па краіне ў 2012. Амаль кожная чацвёртая сярод кандыдатаў - прадстаўніца выдатнага полу.
Судзячы па колькасці патэнцыяльных кандыдатаў, у выбаршчыкаў кожнай акругі будзе альтэрнатыва.
Завершыцца рэгістрацыя 11 жніўня. Для праверкі інфармацыі, якую кандыдаты паказалі ў дакументах, акруговыя камісіі будуць прыцягваць дзяржорганы. Пад кантролем усё: ад сабраных подпісаў да судзімасці і дэкларацыі аб прыбытках.
Да прыкладу, у Мінскай вобласці некалькіх вылучэнцаў праводзілі агітацыю без рэгістрацыі. Іх заяўку не знялі, проста папярэдзілі. Агітаваць трэба не толькі своечасова, але і па месцы. Не рэкамендуюць збірацца: на плошчах Кастрычніцкая, Незалежнасці, Перамогі і Якуба Коласа, плошчы Дзяржаўнага флага, тэрыторыі ля чыгуначнага вакзалу. Праводзіць масавыя мерапрыемствы не раяць і побач з рэзідэнцыяй Прэзідэнта, ля будынкаў Нацыянальнага сходу і Савета Міністраў.
У такі важны для краіны палітычны момант асаблівае значэнне надаецца пытанням працы СМІ. Паводле палажэння аб арганізацыі і правядзенні перадвыбарных выступленняў, іх даты вызначыць Белтэлерадыёкампанія. Да прыкладу, кандыдаты, якія балатуюцца ў выбарчых акругах, створаных у Мінску, выступяць у эфіры тэлеканала "Беларусь 3". Студыі галоўнага медыяхолдынга краіны да самага, мабыць, цікавага этапу перадвыбарнай гонкі ўжо гатовыя.
Кандыдаты ў дэпутаты выступяць у самы рэйтынгавы эфірны час з 7 да 8 вечара. Праўда, толькі ў будныя дні. У выхадныя на блакітных экранах мы іх не ўбачым. Каб распавесці сваю перадвыбарную праграму і заваяваць сімпатыі выбаршчыкаў, кожнаму адведзена не больш за пяць хвілін. Традыцыйна гэты час выкарыстоўваюць па максімуме, некаторыя прыходзяць на запіс з тэзісамі. А вось на тэледэбаты - гэта яшчэ адна магчымасць заявіць пра сябе - згаджаюцца нямногія.
Магчыма, сёлета ад высокай канкурэнцыі на дэпутацкае крэсла кандыдаты не пакінуць убаку самы відовішчны пункт у агітацыйнай барацьбе. Вызначыцца з тымі, хто зойме сваё месца ў парламенце, трэба 11 верасня.
