Трохбаковая кантактная група па ўрэгуляванні сітуацыі ў Данбасе спрасціла рэжым перасячэння лініі судакранання праз пункты пропуску на Радаўніцу. Гэта дасць жыхарам усходняй Украіны магчымасць спакойна і бяспечна наведваць могілкі і цэрквы. Як чакаецца, адчыняцца пункты пропуску будуць на гадзіну раней, а зачыняцца на адну гадзіну пазней. Спецпрадстаўнік АБСЕ ў трохбаковай кантактнай групе па Украіне Марцін Сайдзік заклікаў да поўнага захавання велікоднага перамір'я ў Данбасе і падзякаваў усім бакам за намаганні ва ўсталяванні велікоднага перамір'я.
Марцін Сайдзік, спецыяльны прадстаўнік АБСЕ ў трохбаковай кантактнай групе па Украіне: "Дзякуючы ім з 30 сакавіка колькасць парушэнняў рэжыму спынення агню значна скарацілася. Аднак дасягнуць поўнага рэжыму цішыні падчас рымска-каталіцкага і пратэстанцкага Вялікадня ўсё ж не атрымалася. Я заклікаю бакі ў інтарэсах насельніцтва прыкласці ўсе намаганні і цалкам выконваць рэжым спынення агню напярэдадні праваслаўнага Вялікадня і пасля таго. Нагадаю, што велікодны перыяд доўжыцца 40 дзён".
Наступнае пасяджэнне трохбаковай кантактнай групы па Украіне пройдзе ў Мінску 18 красавіка.
