Многія з іх, зыходзячы са свайго вопыту, ведаюць, якім павінен быць дэпутат парламента. Патрабаванні выстаўлялі самыя высокія, анкеты прэтэндэнтаў вывучылі загадзя.
Што ўплывовыя людзі краіны лічаць самым галоўным, робячы свой выбар на наступныя чатыры гады, высветліла Вераніка Бута.
У парламенце не павінна быць выпадковых людзей, у дэпутата павінен быць станоўчы вопыт працы на вытворчасці, прадпрыемствах, у навуцы і бізнесе. Такія патрабаванні да свайго кандыдата прывёў віцэ-прэм'ер. Людзі, якія на практыцы ведаюць, як гэта - штодня мець дачыненне да лёсу рэспублікі, традыцыйна больш патрабавальныя да сваіх кандыдатаў. Уважліва вывучыўшы спіс прэтэндэнтаў на месца ў парламенце ад сваёй акругі, Анатоль Калінін свой выбар рабіў нядоўга.
Анатоль Калінін, намеснік прэм'ер-міністра Беларусі: "Мы галасуем за росквіт нашай роднай Беларусі, за яе стабільнасць, незалежнасць. Сапраўды, мы шмат чаго дасягнулі. І на чарговым Пятым Усебеларускім сходзе народ прагаласаваў за развіццё эканомікі, за развіццё сацыяльна-эканамічных адносін, за стабільнасць сацыяльнай дзяржаўнай палітыкі і яе прасоўванне".
Загадзя падрабязна вывучыла сваіх кандыдатаў і Наталля Качанава. Грунтуючыся на сваёй практыцы, намеснік прэм'ер-міністра ўпэўненая, што дэпутат павінен у першую чаргу бачыць рэальную карціну становішча ў краіне, каб прынесці карысць людзям.
Хто як не Старшыня Савета Рэспублікі Нацыянальнага сходу ведае працу дэпутатаў. Сенатар ужо папярэдзіў: да 2020 года будучым парламентарыям трэба прыняць каля паўсотні законаў. У іх ва ўсіх галоўная мэта - забяспечыць устойлівае развіццё краіны. Зыходзячы са свайго вопыту, Міхаіл Мясніковіч таксама без асаблівай цяжкасці зрабіў свой выбар.
Міхаіл Мясніковіч, Старшыня Савета Рэспублікі Нацыянальнага сходу Беларусі: "Наперадзе 4 гады вельмі напружанай працы. І, безумоўна, мы бачым таксама адну з самых галоўных задач - гэта пытанні ўніфікацыі, гарманізацыі заканадаўства з нашымі партнёрамі па ЕАЭС і РФ у першую чаргу. Свет развіваецца, свет інтэгруецца, і аснову ўстойлівага як рэгіянальнага, так і нацыянальнага развіцця складаюць транснацыянальныя карпарацыі, фінансава-прамысловыя групы".
Свой голас за аднаго з кандыдатаў аддаў Прэм'ер-міністр Беларусі Андрэй Кабякоў. На выбарчы ўчастак ён прыйшоў са сваёй жонкай.
Сёлета ў выбаршчыкаў няпросты выбар, сярод кандыдатаў вялікая канкурэнцыя. У сярэднім конкурс на месца - 4,5. У некаторых акругах толькі адзін з сямі кандыдатаў па выніках галасавання зможа стаць дэпутатам парламента. На ўчастку №511, які ўжо назвалі VIP-участкам, бо сёння туды дайшлі зрабіць свой выбар шматлікія высокапастаўленыя чыны са сваімі сем’ямі, таксама пахваліўся высокім конкурсам - 5 чалавек на месца.
Да выхаднога дня дадаецца яшчэ і традыцыйнае для дня выбараў адчуванне свята. На ўчасткі прыходзяць сем'ямі, тым самым бацькі сваім асабістым прыкладам паказваюць, як важна не быць убаку, калі прымаюцца важныя для горада і для краіны рашэнні.
Міністр замежных спраў Уладзімір Макей, як заўсёды, зрабіў свой выбар сумесна з жонкай і дзіцем. Бюлетэнь ва урну для галасавання апусціла і ўнучка Аляксандра Радзькова, старшыні самага аўтарытэтнага грамадскага аб'яднання краіны "Белая Русь". З юных гадоў дзяцей далучаюць да важных падзей у жыцці рэспублікі.
Некаторыя вядомыя беларусы - у большасці гэта кіраўнікі ведамстваў і міністэрстваў - зрабілі свой выбар напярэдадні. Пры выбары свайго кандыдата старшыня Камітэта дзяржкантролю Леанід Анфімаў кіраваўся дэвізам "За моцную і квітнеючую Беларусь!"
Леанід Анфімаў, старшыня Камітэта дзяржкантролю Беларусі: "Я хачу, каб вось гэты дэвіз ішоў разам з намі на працягу ўсёй працы беларускага парламента. Людзі павінны любіць сваю Радзіму такой, якая яна ёсць, нават з яе недахопамі, і імкнуцца ўхіліць гэтыя недахопы канструктыўна. Таму я лічу, што кандыдат, за якога я прагаласаваў, здольны зрабіць, каб краіна, у якой мы жывем, адказвала дэвізу, пра які я сказаў".
Свой выбар датэрмінова зрабіла і кіраўнік Цэнтрвыбаркама. Сёння, у асноўны дзень парламенцкіх выбараў, на далікатных плячах Лідзіі Ярмошынай зусім не лёгкія пытанні - ход галасавання па ўсёй краіне пад яе кантролем. Свой голас старшыня ЦВК аддала на гэтым тыдні таксама на вядомым 511-м участку сталіцы.
Лідзія Ярмошына, старшыня Цэнтральнай камісіі Беларусі па выбарах і правядзенні рэспубліканскіх рэферэндумаў: "Гэты чалавек павінен нешта ўяўляць у сваім жыцці, ён ужо павінен чагосьці дамагчыся - альбо вядомасці, альбо значнага капіталу, альбо мець цудоўную адукацыю і перспектывы на будучыню. У кожнага павінна быць свая адметнасць. Адразу магу сказаць, што я прагаласавала за чалавека, якога ведаю".
Адметнасць у сваіх кандыдатах шукалі і высокапастаўленыя чыны, і звычайныя беларусы. У выбарчай кампаніі пасады не маюць ніякага значэння, усе на роўных пазіцыях - галасы раўназначныя. Галоўнае - сумеснымі высілкамі выбраць годную каманду, якая дазволіць нам зрабіць яшчэ адзін значны крок наперад у развіцці дзяржавы.
