Рашэнне аб спрашчэнні візавага рэжыму з ЕС узмоцніць міжчалавечыя кантакты паміж Беларуссю і Захадам

Рашэнне аб спрашчэнні візавага рэжыму з ЕС  актывізуе дзелавую актыўнасць і ўзмоцніць  міжчалавечыя кантакты паміж Беларуссю і Захадам. Так эксперты каменціруюць пагадненне, адобранае Кіраўніком дзяржавы, па спрашчэнні выдачы віз і рэадмісіі з Еўрапейскім саюзам.

Яўген Прэйгерман, палітолаг: "Бізнес - гэта адна з тых катэгорый, якія могуць выйграць у першую чаргу, таму што механізмы, якія будуць закладзеныя ў гэтым пагадненні, некалькі спросцяць бізнес-візіты, хоць не сказаць, што яны і зараз вельмі праблематычныя. Мы многія гады назіраем карціну, калі Беларусь на першым месцы ў свеце па колькасці выдадзеных шэнгенскіх віз на душу насельніцтва. Пасля заключэння гэтага пагаднення, якое спросціць некаторыя працэдуры, мы можам чакаць пазітыўную дынаміку".

Зараз Міністэрства замежных спраў чакае сігналу ад еўрапейскіх партнёраў аб завяршэнні неабходных працэдур з іх боку. Нагадаем, пагадненне аб спрашчэнні выдачы віз на ўзаемнай аснове палегчыць візавыя працэдуры для шырокай катэгорыі грамадзян і знізіць зборы да 35 еўра.