Прамежкавыя справаздачы місій назіральнікаў на прэзідэнцкіх выбарах у нашай краіне апублікавалі эксперты Садружнасці Незалежных Дзяржаў і Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе. Суаўтарамі двух тэкстаў выступілі каля 50 чалавек ад БДІПЧ АБСЕ і больш як 300 акрэдытаваных прадстаўнікоў ад краін і структур СНД. Прычым, усе яны адзначылі шэраг пазітыўных крокаў улад і паспяховых новаўвядзенняў сёлетняй выбарчай кампаніі і, канкрэтна, яе пачатковых стадый.
Заходнія назіральнікі адзначылі, што з парламенцкай кампаніі 2012 года з'явіліся змяненні, якія датычацца пераважна медыя і пытання фондаў кандыдатаў. Было падкрэслена, што тры зарэгістраваныя кандыдаты маюць у ЦВК прадстаўнікоў з правам дарадчага голасу. А на ўзроўні камісій у цэлым па краіне месцы атрымалі каманды ўсіх чацвярых прэтэндэнтаў на пасаду.
Большасць назіральнікаў ад БДІПЧ АБСЕ звярнулі ўвагу на адкрытасць перадвыбарнай атмасферы, але адзначылі і тое, што з пункта погляду апазіцыі выбарка кандыдатаў была абмежаваная. Пры гэтым доступ да інфармацыі па выбарах у Інтэрнэце істотна больш адкрыты, чым раней, а колькасць навінавых сайтаў, якія асвятляюць кампанію, значна ўзрасла.
Таксама заходнія эксперты пацвердзілі магчымасць без абмежавання мець зносіны не толькі з прадстаўнікамі ўлад, але і з кандыдатамі, удзельнікамі палітычных партый, медыя і НГА. Тым не менш, справаздача БДІПЧ утрымлівае шэраг адсылак да некаторых неназваных "апытаных місіяй людзей", у тым ліку былых кандыдатаў, якія адзначылі "недахоп роўных магчымасцяў".
Эксперты ад СНД, у сваю чаргу, падкрэслілі, што своечасовае запрашэнне місіі дазволіла вырашыць арганізацыйныя пытанні і забяспечыць сістэмны маніторынг выбарчага працэсу. А таксама адзначылі, што ў Рэспубліцы Беларусь створаныя ўсе неабходныя прававыя і арганізацыйна-тэхнічныя ўмовы для міжнароднага назірання за выбарамі, што сведчыць аб адкрытасці і празрыстасці выбарчага працэсу
Акрамя гэтага, на думку місіі СНД, падрыхтоўка да выбараў праводзіцца планава і паслядоўна, вылучэнне і рэгістрацыя кандыдатаў у Прэзідэнты, а таксама разгляд скарг і зваротаў праходзіў у адпаведнасці з Кодэксам.
Мабыць, галоўнае ж прынцыповае адрозненне дзвюх справаздач складаецца ў тым, што ў БДІПЧ АБСЕ абгаварылі, што прадстаўленыя ў справаздачы плюсы і мінусы - гэта вывады толькі асобных членаў місіі. А вось назіральнікі ад СНД са сваім афіцыйна выказаным меркаваннем, заднім лікам спрачацца не збіраюцца. Яны выказалі яго і будуць улічваць пры складанні выніковай справаздачы. У тым ліку і пазітыўныя моманты. Як і належыць, цалкам.
