Беларусь і Еўрасаюз значна прасунуліся ў развіцці ўзаемаадносін. Аб гэтым заявіў Прэзідэнт Аляксандр Лукашэнка на сустрэчы з еўракамісарам па бюджэце і кадравых рэсурсах.
Гюнтэр Этынгер гэтымі днямі знаходзіцца з візітам у нашай краіне. Калі паміж Мінскам і Бруселем і бываюць праблемы, то яны ўжо сапраўды не носяць хранічнага характару і іх можна вырашыць. Еўрасаюз - другі па значнасці рынак для беларускага экспарту. Па выніках 2018 года ў гандлі з ЕС спецыялісты адзначаюць станоўчы трэнд. Тавараабарот паказаў амаль 20-працэнтны рост і перавысіў 17 мільярдаў долараў. Прычым, пастаўляем у ЕС больш, чым купляем. Гэта важна, улічваючы, што мы мэтанакіравана дыверсіфікуем знешні гандаль.
У цэлым адносіны Мінска і Бруселя апошнія гады развіваюцца ў пазітыўным ключы. Гэта пацвярджае і частата візітаў еўрапейскіх палітыкаў. Мінулы год быў рэкордным па колькасці кантрактаў з урадамі краін ЕС і еўраструктурамі. Адчуваецца, што цікавасць ЕС да Беларусі расце, як і цікавасць заходніх кампаній.
