З 520 чалавек на фініш дашлі 484 прэтэндэнты на дэпутацкае крэсла ў парламенце. Да гэтага моманту са сваім выбарам вызначыліся каля 25% выбаршчыкаў - гэта вынікі 4 дзён датэрміновага галасавання. Сёння роўна ў 19:00 яно завяршылася. Заўтра - асноўны дзень выбараў у Палату прадстаўнікоў. Аддаць свой голас за таго або іншага кандыдата змогуць амаль сем мільёнаў грамадзян Беларусі. Прычым зрабіць гэта можна і за межамі краіны. Пра ход датэрміновага галасавання - рэпартаж Аляксея Кандраценкі.
У мінулым тысячы кіламетраў шляху і доўгія гадзіны працы. Місія назіральнікаў ад СНД сёння завяршыла перадвыбарны маніторынг па краіне ў Мінскім раёне. Празрыстасць і адкрытасць працы ўчасткаў, адзначаюць эксперты, тое, што іх аб'ядноўвае ва ўсіх рэгіёнах Беларусі. Кіраўнік місіі Сяргей Лебедзеў дадае: ніякіх прэтэнзій і да практыкі датэрміновага галасавання. Праца вялася дакладна і зладжана.
Сяргей Лебедзеў, кіраўнік місіі назіральнікаў ад СНД: "У нас добры кантакт з арганізатарамі выбараў. Мы ўсюды сустракаем адкрытасць. Што б мы ні захацелі паглядзець, дакументы або кабінеты, для нас не ствараюць ніякіх перашкод".
Тут жа - на ўчастках у Заслаўі - нямала і саміх выбаршчыкаў, якія галасуюць датэрмінова. Паездка за горад або ў госці, праца на прысядзібным участку - у выхадны дзень у кожнага нямала спраў. Ды і надвор'е радуе. Аднак прыйсці на выбары для шматлікіх правіла.
Не ўпершыню аддае свой голас датэрмінова на выбарах і Андрэй Шорац. На выбарчы ўчастак сталічны мэр сёння прыйшоў з сям'ёй. Далучэнне дзяцей да грамадска-палітычнага жыцця, паводле слоў граданачальніка, можа, і заўчаснае, але, у любым выпадку, асэнсаванае і перспектыўнае.
Андрэй Шорац, старшыня Мінгарвыканкама: "Я лічу, што з самага ранняга дзяцінства дзеці павінны разумець, што яны грамадзяне краіны, і ўдзельнічаць у грамадскім жыцці. Кандыдат павінен быць прафесіяналам, які сваімі рэальнымі ўчынкамі даказаў, што ён нешта можа. І калі ён такі, то ён будзе годным прадстаўніком горада ў парламенце".
Пры дэфіцыце часу ў нашых спартсменаў заўсёды актыўная грамадзянская пазіцыя. Менавіта таму паміж трэніроўкамі і спаборніцтвамі зоркі спорту імкнуцца прагаласаваць датэрмінова. Як гэта і зрабіла мінчанка Любоў Чаркашына.
Любоў Чаркашына, бронзавы прызёр Алімпіяды-2012 па мастацкай гімнастыцы: "Мне вельмі спадабалася, што на маім участку дакладна жанчын апынулася больш. Гэта выдатна, што жанчыны жадаюць ісці ў палітыку, сябе спрабаваць, жадаюць прыносіць нешта новае".
У цэлым жа ў сталіцы больш за ўсё выбаршчыкаў, а таксама прэтэндэнтаў на месца ў парламенце - іх 112. А значыць, і ступень адказнасці максімальная.
Арцём Цуран, сакратар мінскай гарадской выбарчай камісіі: "Маніторынг участковых камісій паказаў: участкі і камісіі гатовыя да правядзення выбарчай кампаніі. Сур'ёзных скаргаў і парушэнняў у акруговыя і ўчастковыя камісіі пакуль не паступала".
Зрабіць выбары больш даступнымі па ўсёй краіне дапамогуць і людзям з абмежаванымі магчымасцямі. Толькі ў сталіцы для гэтага задзейнічаныя сацыяльныя таксі, а таксама каля 400 валанцёраў. Акрамя таго, на выбарчых участках для слабавідушчых і невідушчых у наяўнасці лупы і бюлетэні са спецыяльным трафарэтам. Ёсць магчымасць прагаласаваць дома.
Пры ўсёй шматграннасці і складанасці электаральных працэсаў сам дзень выбараў традыцыйна абяцае быць па-сапраўднаму святочным. Падарункі для тых, хто галасуе ўпершыню, дэгустацыя страў беларускай кухні, гандаль са скідкамі і забаўная праграма. Усё гэта чакае тых, хто 11 верасня прыйдзе на выбарчыя ўчасткі па ўсёй краіне.
Дарэчы, усяго іх амаль шэсць тысяч, 47 за мяжой. Паўсюдна дзверы ўчасткаў заўтра будуць адчыненыя з 8 раніцы і да 20 гадзін вечара.
