Навіны, за кошт чаго супрацоўніцтва будзе пашырацца, і пра дасягнутыя дамоўленасці, чакаем заўтра - чацвер стане асноўным днём перамоў. Абмеркаваць партнёрам ёсць што. Акрамя далейшых крокаў узаемадзеяння, гэта і рэалізацыя планаў, пра якія лідары дзвюх краін гаварылі на сустрэчы ў Эквадоры летась.
Нагадаем, тады адной з асноўных задач Аляксандр Лукашэнка і Рафаэль Карэа Дэльгада пазначылі выхад на гандаль без пасрэднікаў, і сустрэча ў цэлым атрымалася вельмі душэўнай. Не менш важным і плённым абяцае стаць і цяперашні візіт. У гэтыя хвіліны ў Нацыянальным аэрапорце Мінск ужо працуе наша здымачная група, кадры сустрэчы высокіх гасцей мы яшчэ абавязкова пакажам.
Пакуль пра тое, з чаго пачыналася супрацоўніцтва і якія крокі ўжо зробленыя, рэпартаж Андрэя Лапцёнка.
Аб тым, што ў адносінах паміж афіцыйным Мінскам і Кіта існуюць значныя рэзервы, паказаў леташні візіт у Эквадор Кіраўніка беларускай дзяржавы.
Тады ў спісе пагадненняў аказаўся цэлы спектр перспектыўных кірункаў. Дамовіліся аб стварэнні двухбаковай камісіі па гандлёва-эканамічным супрацоўніцтве, падпісалі шэраг пагадненняў у галіне адукацыі, навукі, тэхналогій і інавацый. Але галоўнае, па-сяброўску, за рамкамі пратакольных сустрэч вызначылі, што ўзаемавыгадны сустрэчны курс на збліжэнне можа ісці па ўсіх кірунках.
Прэзідэнт Рафаэль Карэа папулярны сярод народа Эквадора - выхадзец са сціплай сям'і. Як ніхто іншы разумее патрэбы людзей. Прыхільнік рэформ, паліглот, Карэа, безумоўна, вылучаецца сярод лідараў Лацінскай Амерыкі сваімі смелымі рашэннямі. Але крок на збліжэнне з Беларуссю - узважаны і прагматычны. Шмат у чым інтарэсы Беларусі і Эквадора сыходзяцца.
Рафаэль Карэа, Прэзідэнт Рэспублікі Эквадор: Усё гатова да нашай сумеснай працы. Нам трэба вельмі шмат зрабіць, асабліва, што тычыцца гандлю.
За апошнія пяць гадоў двухбаковы тавараабарот паміж краінамі падвоіўся. У асноўным, вядома, за кошт беларускага экспарту ўгнаенняў. Дынаміка ёсць, але лічбы могуць расці.
Ад Беларусі прамысловыя тавары і паслугі, першым чынам кар'ерная, сельскагаспадарчая і дарожна-будаўнічая тэхніка, пасажырскі транспарт. Тыя самыя мінеральныя ўгнаенні, станкі, шыны, хімвалакно, оптыка, электроніка. Эквадор дзякуючы высокай канкурэнтаздольнасці сваіх харчовых тавараў можа павялічваць ролю ў насычэнні нашага рынку тымі прадуктамі, якія Беларусь імпартуе, - садавіна, морапрадукты, кава і нават кветкі.
З якасцю паслуг і тавара з Эквадора нашы імпарцёры знаёмыя ўжо добра.
Цемур Дарбаідзэ, менеджар кампаніі: Нашы пастаўшчыкі - вельмі прыстойныя людзі. Пастаўкі імкнуцца выконваць максімальна якасна. Мы нарошчваем аб'ёмы, вельмі прыемна з імі працаваць.
Наменклатуру паставак трэба пашыраць і рабіць гэта ў абход старой практыкі - не праз трэція краіны, а напрамую. У верасні гэтага года Мінск наведалі дзелавыя колы Эквадора. Абмяркоўвалі перспектыўныя кірункі.
Уладзімір Улаховіч, намеснік старшыні Беларускай гандлёва-прамысловай палаты: Гэты рынак і дзяржава валодаюць даволі добрым патэнцыялам з пункта погляду натуральных рэсурсаў, з пункта погляду асваення радовішчаў. І тут Беларусь таксама можа прапанаваць сваю тэхналогію і сваю тэхніку.
Цяперашні візіт прэзідэнта Эквадора як раз працяг пачатага дыялогу. Прынятае запрашэнне Кіраўніка беларускай дзяржавы прыехаць і асабіста пераканацца ў беларускіх магчымасцях, можна назваць і зверкай гадзіннікаў. І, безумоўна, новая сустрэча - дэманстрацыя сур'ёзных намераў на шляху збліжэння дзвюх краін.
