Сёння ў беларускім парламенце прайшлі першыя публічныя абмеркаванні новых правіл крымінальнага і крымінальна-працэсуальнага заканадаўства. Зараз з'явіцца адразу некалькі паняццяў. Самая галоўная навацыя законапраекта - дасудовае пагадненне. Яно гарантуе змякчэнне пакарання, але толькі пры ўмове дапамогі следству. Акрамя таго, дэпутаты выступілі і за павелічэнне мінімальных штрафаў за эканамічныя і карупцыйныя злачынствы. Што яшчэ зменіцца ў крымінальным кодэксе - з падрабязнасцямі наш карэспандэнт Ілона Красуцкая.
Новыя старонкі крымінальнага і крымінальна-працэсуальнага кодэксаў пакуль у чарнавым варыянце. У жніўні іх абмяркоўвалі на вялікай нарадзе ў Прэзідэнта. Сёння ў першым чытанні парламент прыняў першыя новаўвядзенні. Адно з рэзанансных - паняцце дасудовае пагадненне. Гэта свайго роду здзелка з правасуддзем: дапамога следству ў абмен на змякчэнне пакарання. Каб скараціць тэрмін, злачынец павінен выканаць шэраг прынцыповых умоў: прызнаць віну, кампенсаваць урон, дапамагчы следству і распавесці не толькі аб сваіх злачынствах.
Сумленнасць тут як гарант будучага закона: больш за палову максімальнага тэрміну злачынец не атрымае. Яшчэ адзін новы тэрмін у беларускім заканадаўстве - абгрунтаваная эканамічная рызыка. Не выключана, што гэтае паняцце разняволіць дзелавую ініцыятыву дырэктараў прадпрыемстваў. І нават стане імунітэтам ад крымінальнай адказнасці.
Дэпутаты падтрымалі і павелічэнне мінімальных штрафаў за эканамічныя і карупцыйныя злачынствы. А вось шэраг артыкулаў адкарэктуюць у бок змякчэння. З 6 да 3 месяцаў скароцяць максімальны тэрмін арышту.
Адной з навін стане і крымінальна-прававая кампенсацыя. У выпадку няцяжкага парушэння справа можа быць закрыта, але пры ўмове прызнання віны, кампенсацыі ўрону, а таксама выплаце дзяржаве вызначанай сумы. Гэтыя грошы накіруюць у фонд для пацярпелых ад злачынстваў.
У Авальнай зале сёння дэпутаты гаварылі і аб міжнародным супрацоўніцтве. Ратыфікавалі некалькі беларуска-камбаджыйскіх пагадненняў. Размова аб гандлёва-эканамічным узаемадзеянні і ўзаемнай абароне інвестыцый. Акрамя таго, перавагі бязвізавых паездак першымі ацэняць уладальнікі дыпламатычных і службовых пашпартоў. А вось Беларусь і Кітай зараз змогуць рэалізаваць праекты тэхніка-эканамічнай дапамогі. Адпаведны законапраект беларускі парламент адобрыў.
