Сёння ўся ўвага сусветных СМІ прыкавана да дыялогу ў Азербайджане. Другі дзень саміту Руху недалучэння. Сваю ініцыятыву агучыла і Беларусь. Так, наша краіна прапанавала ў 2021 годзе правесці канферэнцыю аб новым уладкаванні свету. Гэта агучыў старшыня Палаты прадстаўнікоў Уладзімір Андрэйчанка. Ён адзначыў, што апошнімі гадамі глабальная палітыка становіцца ўсё больш хаатычнай і непрадказальнай, а супрацоўніцтва паміж вялікімі дзяржавамі слабее.
Уладзімір Андрэйчанка, Старшыня Палаты прадстаўнікоў Нацыянальнага сходу Беларусі: "Пастаянна памнажаюцца глабальныя выклікі выжывання чалавецтва: тэрарызм, змяненне клімату, распаўсюджванне ядзернай зброі і многае іншае. Мы абсалютна перакананыя, што ў Руху недалучэння ёсць значны патэнцыял, каб ператварыцца ў адзін з магутных лакаматываў аб'яднання і процідзеяння гэтым выклікам і негатыўным тэндэнцыям. Але ў свеце, дзе няма ўзаемнай павагі і даверу, гэтай мэты не дасягнуць. Нам трэба будзе аднаўляць гэты давер. Неабходна наладзіць шырокі міжнародны дыялог па пераадоленні супярэчнасцяў паміж дзяржавамі. Беларусь ужо прыкладвае намаганні ў гэтым напрамку. Кіраўнік беларускай дзяржавы ініцыяваў адраджэнне ўсёабдымнага перагаворнага працэсу аб шляхах умацавання даверу паміж краінамі па аналогіі з Хельсінкскім працэсам. Мы разлічваем, што краіны Руху пазітыўна адгукнуцца на гэтую ініцыятыву".
Адзначым, Рух недалучэння аб'ядноўвае 120 дзяржаў на прынцыпах няўдзелу ў ваенных блоках. Наша краіна ў складзе ўдзельнікаў з 1998 года.
Беларусь прапанавала правесці канферэнцыю аб новым уладкаванні свету
26 октября 2019