На мяжы з Беларуссю Расія ўводзіць рэжым пагранічнай зоны

2 Лютага 2017

Расія прыняла рашэнне аб увядзенні пагранзоны на мяжы з Беларуссю без папярэдняга паведамлення, заявілі сёння ў МЗС нашай краіны. Напярэдадні ФСБ Расіі даручыла ўвесці пагранічную зону ў межах Бранскай, Смаленскай і Пскоўскай абласцей з 6 лютага.

У МЗС нашай краіны пры гэтым мяркуюць, што драматызаваць гэтую сітуацыю не варта. Як паведаміла намеснік начальніка ўпраўлення інфармацыі - начальнік аддзела прэс-службы МЗС Беларусі Марыя Ваньшына, гэты дакумент аналізуецца. Але адразу ж варта звярнуць увагу на два важныя аспекты.

Марыя Ваньшына, начальнік аддзела прэс-службы МЗС Беларусі:

"Па-першае, насуперак усім наяўным дамоўленасцям расійскі бок прыняў рашэнне аб увядзенні пагранічнай зоны на мяжы з Беларуссю без папярэдняга апавяшчэння. З улікам узроўню прамога ўзаемадзеяння нашых пагранічных службаў і іх узаемнага прадстаўніцтва такая нескаардынаванасць дзеянняў выклікае справядлівыя пытанні.

Па-другое, у многіх складваецца ўражанне, што гэтыя дзеянні вядуць да аднаўлення паўнавартаснага кантролю на беларуска-расійскай мяжы, адмененага больш чым дваццаць гадоў таму. А гэта ідзе насуперак шэрагу дамоўленасцяў, якія прадугледжваюць базавы прынцып адкрытасці межаў паміж Рэспублікай Беларусь і Расійскай Федэрацыяй".

У МЗС Беларусі асабліва падкрэсліваюць, што ў гэтым выпадку ініцыятыва зыходзіць не ад беларускага боку. І адзначылі, што, на жаль, гэта не першы такі выпадак. Падобная сітуацыя адбылася ў пачатку 2016 года, калі Расія фактычна пачала ўводзіць абмежаванні на ўезд грамадзян трэціх краін праз мяжу Беларусі і Расіі.