Каб абмеркаваць пытанні еўразійскай бяспекі, у сталіцы Беларусі збіраюцца лідары шасці краін: Арменіі, Беларусі, Казахстана, Кыргызстана, Расіі і Таджыкістана.
Сустрэча пройдзе ў Палацы Незалежнасці, дзе ўжо працуе наша здымачная група. Усе падрабязнасці даведаемся ў нашага аглядальніка Вольгі Макей (прамое ўключэнне).
Добры дзень, калегі. Сапраўды, Мінск чарговы раз стаў цэнтрам еўразійскай палітыкі. Нават ДАІ ў гэтыя дні раіць перасесці на грамадскі транспарт, бо некаторыя вуліцы ў цэнтры будуць перакрывацца для праезду картэжаў – усё ж у Палацы Незалежнасці на саміт АДКБ збяруцца прэзідэнты шасці дзяржаў.
Што цікава: пяць з шасці краін - удзельніц АДКБ уваходзяць у склад Еўразійскага эканамічнага саюза. Выключэнне - Таджыкістан. І тут важна сказаць, што без гарантавання галоўнага - бяспекі - эканоміка наўрад ці зможа развівацца. Пагадзіцеся, пытанні гандлю, прамысловай кааперацыі або інвестыцыйнага супрацоўніцтва адыходзяць на другі план, калі не створаныя ўмовы для спакойнага жыцця людзей і ў цэлым стабільнага становішча ў грамадстве. Такіх прыкладаў у свеце сёння, на жаль, звышдастаткова. Менавіта для таго, каб абмеркаваць актуальныя праблемы міжнароднай бяспекі і зверыць пазіцыі ў барацьбе са знешнімі пагрозамі, і сустракаюцца прэзідэнты.
У такіх самітаў ёсць свае пратакольныя традыцыі. Лідары шасці краін перш правядуць перамовы ў вузкім складзе, затым у пашыраным. На парадку дня каля 20 пытанняў. Па выніках сустрэчы плануецца падпісанне шэрагу дакументаў. Сёлета Беларусь - старшыня ў АДКБ. Таму на сустрэчы будуць падведзеныя вынікі гэтай працы. Сярод беларускіх ініцыятыў: узмацненне ролі арганізацыі на міжнароднай арэне, павышэнне аператыўнай гатовасці калектыўных сіл з акцэнтам на практычны складальнік, удасканаленне сістэмы крызіснага рэагавання і ў цэлым паглыбленне ваенна-тэхнічнага супрацоўніцтва і гарантаванне эканамічнай бяспекі. Што зроблена ў гэтых кірунках, абмяркуюць кіраўнікі дзяржаў.
Сімвалічна, старшынства нашай краіны прыпала на юбілейны год. У АДКБ адзначаюць адразу дзве круглыя даты: Дагавору аб калектыўнай бяспецы 25 гадоў, а самой арганізацыі - 15. У сувязі з юбілеем плануецца прыняцце дэкларацыі кіраўнікоў дзяржаў. Да падпісання рыхтуюць дакументы і ў сферы інфармацыйнай бяспекі, і ў процідзеянні міграцыі. Абмяркуюць палітыкі і рабочыя моманты: напрыклад, бюджэт на наступны год, размеркаванне квотных пасад - і нават прымуць рашэнне аб эмблеме і флагу арганізацыі.
Дарэчы, Беларусь перадасць эстафету старшынства ў АДКБ Казахстану, нагадаем, Нурсултан Назарбаеў у нашай краіне знаходзіцца з двухдзённым афіцыйным візітам.
Зараз за маёй спінай вы бачыце флагі ўсіх дзяржаў - удзельнікаў АДКБ. На іх фоне адбудзецца традыцыйная цырымонія фатаграфавання. Але, магчыма, гэтая фатаграфія ў будучыні папоўніць калекцыю ў Палацы Незалежнасці. Як бачым, на другім паверсе разгарнулася экспазіцыя са здымкаў, на якіх - самыя яркія падзеі для нашай краіны. Такім, напэўна, стане і гэты юбілейны саміт АДКБ.
