МЗС Беларусі сочыць за сітуацыяй пасля ўвядзення Расіяй пагранічнай зоны для своечасовага аказання грамадзянам неабходнай прававой дапамогі. Сёння гэта заявілі ў МЗС нашай краіны.
Якіх-небудзь праблемных пытанняў ад беларусаў не паступала. Дзмітрый Мірончык падкрэсліў, што Беларусь па-ранейшаму адданая прынцыпу адкрытасці мяжы з Расіяй у духу саюзніцкіх адносін.
Дзмітрый Мірончык, начальнік упраўлення інфармацыі - прэс-сакратар МЗС Беларусі: "Яшчэ раз адзначу, што мы адсочваем развіццё падзей. Спадзяемся, што кампетэнтныя органы абедзвюх краін змогуць у самыя кароткія тэрміны разабрацца ў сітуацыі і дамовіцца пра яе надзейнае прававое ўрэгуляванне, зыходзячы з інтарэсаў грамадзян Беларусі і Расіі".
Беларусь добрасумленна выканала міжнародныя абавязацельствы пры экстрадыцыі блогера Аляксандра Лапшына ў Азербайджан. Рашэнне аб выдачы ўвайшло ў законную сілу 7 лютага. Расійска-ізраільскі блогер Аляксандр Лапшын быў затрыманы ў ноч на 15 снежня ў Мінску па запыце Азербайджана. Ён вінаваціцца ў парушэнні законаў Азербайджана аб дзяржаўнай мяжы і пашпартах.
Дзмітрый Мірончык, начальнік упраўлення інфармацыі - прэс-сакратар МЗС Беларусі: "Я ўпершыню звяртаюся да пытання Аляксандра Лапшына, і гэта зусім не выпадкова. 7 лютага свой вердыкт вынес Вярхоўны суд Рэспублікі Беларусь. Учора гэтую тэму пракаменціравалі Генеральная пракуратура і Міністэрства ўнутраных спраў. Экстрадыцыя - пытанне, якое ляжыць выключна ў прававой плоскасці. Беларусь добрасумленна выканала свае міжнародныя абавязацельствы па міжнароднай дамове ў аказанні прававой дапамогі. Дамовы павінны выконвацца".
Паводле слоў Дзмітрыя Мірончыка, сітуацыя з кантролем грамадзян, якія прыязджаюць у нашу краіну, у цэлым не змянілася. Пры перасячэнні мяжы ў аэрапорце праверкі здзяйсняюць у тых жа базах непажаданых асоб і з выкананнем усіх працэдур, як і раней.
