Кантактная група па ўрэгуляванні канфлікту ў Данбасе на сённяшнім пасяджэнні не змагла зацвердзіць адзіны тэкст заявы па пытанні ўвядзення новага перамір'я ў рэгіёне ў сувязі з велікоднымі святамі. Размова пра велікоднае перамір'е з 26 красавіка ішла і на папярэдняй сустрэчы кантактнай групы два тыдні таму. Тады кіеўская дэлегацыя адмовілася ўзгадняць дадатковыя меры па забеспячэнні спынення агню. Хоць пры гэтым саму ідэю бакі падтрымліваюць.
Марцін Сайдзік, спецпрадстаўнік АБСЕ ў трохбаковай кантактнай групе: "Бакі ў прынцыпе падтрымлівалі ідэю велікоднага перамір'я але, на жаль, яны не змаглі прыйсці да адзінага тэксту заявы. Я спадзяюся, што на справе бакі будуць устрымлівацца ад баявых дзеянняў, у прыватнасці, на працягу будучых велікодных і майскіх свят".
Марцін Сайдзік прывітаў выбар украінскага народа на прэзідэнцкіх выбарах і намер новаабранага прэзідэнта дзейнічаць па ўрэгуляванні канфлікту "ў нармандскім фармаце" і працягваць мінскі працэс.
