Вынікі сустрэчы "нармандскай чацвёркі"

20 Кастрычніка 2016

Вынікі сустрэчы "нармандскай чацвёркі", якая напярэдадні адбылася ў Берліне, сёння падводзяць палітыкі і аналітыкі. У цэлым гучаць пазітыўныя ацэнкі. Аднак некаторыя эксперты адзначаюць, што завышаных чаканняў ад гэтых перамоў не было. Па факце бакі прызналі безальтэрнатыўнасць мінскіх дамоўленасцяў па ўрэгуляванні сітуацыі на паўднёвым усходзе Украіны. Лідары Расіі, Украіны, Францыі і Германіі гатовыя да пачатку распрацоўкі дэталёвай дарожнай карты для рэалізацыі гэтых пагадненняў. У першую чаргу неабходна дабівацца развядзення сіл у Данбасе і поўнага спынення агню. У Крамлі адзначылі, што зрэшты дыпламатычныя намаганні па дасягненні гэтых мэт з боку трохбаковай кантактнай групы на мінскай пляцоўцы не спыняюцца.

Расказвае Лізавета Казакова.

Як вывесці з тупіку мірны працэс на Данбасе? Удзельнікі гэтых доўгачаканых перамоў абмяркоўвалі шляхі неабходных дзеянняў на працягу пяці гадзін. Апошні раз у такім фармаце прэзідэнты Расіі, Францыі, Украіны і канцлер ФРГ збіраліся ў Францыі роўна год таму. Але ў Берліне ўдалося не проста зверыць гадзіннікі, а перайсці да выпрацоўкі дарожнай карты па рэалізацыі мінскіх пагадненняў. Г.з., можна гаварыць пра канкрэтныя дыпламатычныя вынікі цяперашняй нармандскай сустрэчы.

У дакумент уваходзіць і дамоўленасць, згодна з якой бакі канфлікту на Данбасе павінны развесці войскі ў 3 раёнах, па якіх раней ужо дамаўляліся, неўзабаве пачнуцца перамовы яшчэ па 4 раёнах.

Дарэчы, гэта важны вынік працы мінскай пляцоўкі: падпісанне рамачнага пагаднення аб развядзенні сіл і сродкаў на Данбасе адбылося ў верасні.

Марцін Сайдзік, спецпрадстаўнік АБСЕ ў трохбаковай кантактнай групе: "Трэба сказаць, што гэта сапраўды вялікі крок наперад. Гэта пагадненне, я думаю, чакалі на вярхах. Не толькі ў Расійскай Федэрацыі, Украіне, але, вядома, і ў Германіі, у Францыі, у нармандскім фармаце. І думаю, што не толькі там. Гэта вельмі вялікі і вельмі важны крок".

І сёння ўсе без выключэння ўдзельнікі берлінскіх перамоў сыходзяцца ў меркаванні - у аснове ўрэгулявання на паўднёвым усходзе Украіны ляжаць мінскія пагадненні. Паводле іх слоў, "гэта адзіная аснова, якая ў нас ёсць".

Прэзідэнт Францыі робіць упор на тое, што ў сферы гарантавання бяспекі варта кантраляваць неадкладнае і поўнае спыненне агню і адвод узбраенняў.

Франсуа Аланд, Прэзідэнт Францыі: "Дарожную карту будуць узгадняць кіраўнікі МЗС краін "нармандскай чацвёркі". Яна будзе складзена з захаваннем усіх палажэнняў мінскіх пагадненняў. Было важна прасунуцца наперад па шэрагу пунктаў, у прыватнасці, па пытаннях гарантавання бяспекі, гуманітарных і палітычных".

Прэзідэнт Расіі Уладзімір Пуцін заявіў аб гатоўнасці ўсіх удзельнікаў перамоў пашырыць місію АБСЕ на Данбасе.

Уладзімір Пуцін, Прэзідэнт Расіі: "Мы шмат увагі надалі пытанням бяспекі і дамовіліся па цэлым шэрагу пазіцый аб тым, што павінна быць зроблена ў найбліжэйшы час у сэнсе далейшага вырашэння пытанняў, звязаных з развядзеннем канфліктных бакоў. У двух месцах гэты адвод ужо адбыўся. Пацвердзілі, што мы гатовыя пашырыць місію АБСЕ ў зоне адводу і ў пунктах захоўвання цяжкай тэхнікі".

Ангела Меркель, канцлер Германіі: "Мы гаварылі пра тое, каб назіральнікі АБСЕ атрымалі доступ да ўсіх рэгіёнаў аж да мяжы. Расійскі прэзідэнт адзначыў гэта, і ў некаторых выпадках гэты доступ абцяжараны. Акрамя таго, як ужо было сказана, калі рыхтуецца выбарчы працэс, калі існуе закон аб выбарах, то можна гаварыць і пра місію АБСЕ, у тым ліку пра ўзброеныя часці".

Ацэнку сустрэчы "нармандскай чацвёркі" ў Берліне далі ў Крамлі. Там адзначылі, што цэлы год пасля папярэдняй сустрэчы ў Парыжы працэс буксаваў на месцы. І цяперашняя безальтэрнатыўная прыхільнасць мінскім пагадненням усіх бакоў - з'ява пазітыўная. Такое ж меркаванне выказаў другі прэзідэнт Украіны Леанід Кучма.

Дзмітрый Мірончык, начальнік упраўлення інфармацыі - прэс-сакратар МЗС Беларусі: "Мы рады прывітаць любы прагрэс, які будзе спрыяць спыненню кровапраліцця і прасоўванню на шляху да мірнага ўрэгулявання на ўсходзе Украіны. Як падкрэслілі ўдзельнікі ўчарашніх перамоў, мінскія дамоўленасці па-ранейшаму з'яўляюцца асновай гэтага працэсу".

МЗС Беларусі, як і раней неаднаразова, падкрэслівае: беларускі бок зробіць усё магчымае для таго, каб праца перагаворшчыкаў на мінскай пляцоўцы зрабіла свой ўнёсак у гэты працэс.