Колькі зваротаў разгледзелі ў камісіях? Як Цэнтрвыбаркам адрэагаваў на крытычныя ацэнкі ад АБСЕ і ПАСЕ? І калі новы парламент пачне працу? Рэпартаж Вольгі Анішчанкі.
ЦВК афіцыйна зарэгістраваў 110 дэпутатаў парламента
Аб тым, якім будзе новы дэпутацкі корпус, стала зразумела ўжо ў ноч на панядзелак. Падлік галасоў праз некалькі гадзін пасля закрыцця ўчасткаў вызначыў пераможцаў. Цэнтрвыбаркам аднак аб’явіў вынікі з важнай рэмаркай: вынікі папярэднія. На той выпадак, калі ў Цэнтральную камісію паступяць сур'ёзныя скаргі, якія дазволяць аспрэчыць вынікі выбараў. Але сёння ЦВК пастанавіў афіцыйна і канчаткова: падстаў пераглядаць вынікі палітычнай кампаніі ў Беларусі не знайшлі.Кожны рэгіён трымае слова: на што скардзіліся кандыдаты, каму і чаму адмовілі ў рэгістрацыі, наколькі актыўны быў выбаршчык? Са справаздачы кожнага дакладчыка складваецца агульная карціна. Скарг на вынікі кампаніі няшмат, нягледзячы на шуміху, гаворыць кіраўнік Цэнтрвыбаркама. У антылідэрах сталіца. Зрэшты, Мінск вылучаўся заўсёды. Адзінкавыя прэтэнзіі да парушэння выбарчага заканадаўства, калі, напрыклад, няправільна склалі спісы выбаршчыкаў. Звярнулі ўвагу на асобныя скаргі назіральнікаў, маўляў, колькасць тых, хто датэрмінова аддаў свой голас па паперах, і візуальныя ацэнкі тых, хто прыйшоў на ўчасткі, разышліся. Але ў цэлым, зазначыць кіраўнік ЦВК, абгрунтаваных прэтэнзій адзінкі. Астатняя справа густу і не можа паўплываць на выніковы расклад.
ЦВК накіраваў пярэчанні на справаздачу АБСЕ па выбарах
У адказ на ўсе папрокі да арганізацыі парламенцкіх выбараў з боку еўрапейскіх місій Цэнтрвыбаркам прапанаваў звярнуцца да статыстыкі. Маўляў, лічбы бесстароннія. Бо нават калі на ўсіх участках, да якіх выказаны прэтэнзіі, агулам не прызнаць вынік, выніковая карціна змяненняў не адчуе. Зрэшты, Лідзія Ярмошына прызналася: ацэнкай АБСЕ, вядома, засмучана, але справаздачу ўсё ж варта ацаніць аб'ектыўна.У цэлым Цэнтрвыбаркам адзначыў высокую цікавасць да выбараў і з боку кандыдатаў у дэпутаты (іх колькасць была самай вялікай з 2000 года), і з боку назіральнікаў. Ці будзе кантралёраў за выбарамі яшчэ больш, цікавіцца прэса. Бо наперадзе прэзідэнцкая выбарчая гонка. Але ў ЦВК тлумачаць: у краіне прымуць усіх, хто выкажа жаданне.
Першая сесія новага парламента адбудзецца 6 снежня
Такім чынам, выбары ў парламент Беларусі адбыліся. Зарэгістраваны ўсе пераможцы. Цэнтральная камісія аднагалосна прымае рашэнне, тым самым дэ-юрэ падводзячы рысу палітычнай кампаніі года.Сёння Цэнтрвыбаркам зацвердзіў дату першай сесіі для новага склікання. У Авальнай зале дэпутаты збяруцца 6 снежня. А гэта значыць, дзеючы дэпутацкі корпус захавае свае паўнамоцтвы толькі на два тыдні, каб завяршыць пачатае. Напрыклад, канчаткова зацвердзіць бюджэт на новы год: галасаваць за дакумент будзе ўжо фактычна ранейшае - шостае - скліканне дэпутатаў на будучым тыдні.
