Градус недаверу і канфрантацыі паміж Усходам і Захадам дасягнуў мяжы. Гэта заявіў Прэзідэнт Беларусі ў Мінску падчас міжнароднай канферэнцыі "Еўрапейская бяспека: адысці ад краю прорвы".
Аляксандр Лукашэнка адзначыў, што больш спакойна ў рэгіёне не становіцца: Масква і Вашынгтон дэнансавалі дакумент аб ліквідацыі ракет меншай і сярэдняй далёкасці, ЗША плануюць выхад з пагаднення па адкрытым небе - усё гэта крокі, якія абвастраюць сітуацыю ў еўрапейскім рэгіёне. І якраз эксперты і палітыкі могуць стаць ключом да вырашэння вельмі няпростай геапалітычнай сітуацыі.
На канферэнцыю ў Мінск прыбылі сотні замежных экспертаў: палітыкі, дыпламаты, кіраўнікі фондаў і прадстаўнікі "фабрык думкі" - аналітычных цэнтраў. Звяртаючыся да спецыялістаў, Аляксандр Лукашэнка асабліва адзначыў сітуацыю ва Украіне. Вайна на ўсходзе краіны забрала жыцці больш як 10 тысяч чалавек, і зараз канфлікт спрабуюць выкарыстаць у сваіх гульнях розныя палітычныя сілы і нават дзяржавы. Асабліва абвастрылася сітуацыя пасля прыняцця Уладзімірам Зяленскім формулы Штайнмаера - дапаўнення да мінскіх пагадненняў. Фактычна першы за апошнія гады крок насустрэч міру нацыяналісты і сапернікі гаспадара Банкавай атакавалі як інфармацыйна, так і агітацыйна. Нельга пакідаць Украіну сам-насам са сваёй бядой - ключавы тэзіс Аляксандра Лукашэнкі.
Яшчэ адна ініцыятыва Мінска, якая прагучала зноў, - працэс "Хельсінкі". НАТА плануе буйныя вучэнні прама ля межаў з Беларуссю. Замарожаны канфлікт у Прыднястроўі. Складаная сітуацыя ў былых рэспубліках Югаславіі, слабы мір устанавіўся ў Сірыі. Размова на мове дыпламатыі, а не зброі дзейсная. І Мінск сёння дае магчымасць такога дыялогу на самыя розныя тэмы.
Адзначым, міжнародны форум "Еўрапейская бяспека: адысці ад краю прорвы" падзелены на шэсць пленарных пасяджэнняў і дыскусій - ад архітэктуры бяспекі да перспектывы кітайскай ініцыятывы "Пояс і шлях". Падрабязнасці ў нашых наступных выпусках.
