Маштабны міжнародны форум "Еўрапейская бяспека: адысці ад краю прорвы" стартаваў сёння ў сталіцы.
На фоне новых глабальных выклікаў наяўная канцэпцыя стратэгічнай стабільнасці выглядае састарэлай. Ад сусветнай супольнасці патрэбны сумесныя дзеянні, адзіны шлях да якіх - раўнапраўны і ўзаемапаважлівы дыялог.
Усяго ў шырокай дыскусіі аб міжнародных адносінах і шляхах гарантавання бяспекі ў кантынентальнай Еўропе ўдзельнічаюць больш за паўтысячы экспертаў з краін ЕС, Расіі, ЗША, Кітая, прадстаўнікоў АБСЕ, АДКБ і НАТА. І гэта асобна адзначаюць замежныя эксперты.
Брэдлі Фрэдэн, дырэктар офіса Усходняй Еўропы Дзярждэпартамента ЗША: "Я думаю, Беларусь робіць свой унёсак у агульную бяспеку ўжо зараз. Я маю на ўвазе, што "Мінскі дыялог" зараз прызнаны як новы міжнародны форум для абмеркавання шэрагу праблем. Сярод іх і еўрапейская бяспека. І вы ведаеце, гэта вельмі каштоўны ўнёсак у мір і стабільнасць у рэгіёне - сабраць столькі людзей разам і абмеркаваць усё".
Якаб Веленштайн, праграмны дырэктар па Беларусі фонду імя Конрада Адэнаўэра: "Беларусь вельмі добры каардынатар форуму. Краіна мае добрыя і моцныя кантакты з Расійскай Федэрацыяй, але таксама яна адкрытая для новых каналаў, новых бакоў, кантрастных у сваіх меркаваннях у адносінах да Расіі, што мы сёння і бачым. Сабраць разам і пачаць дыялог у такім вялікім фармаце адкрывае вельмі добрыя магчымасці для платформы "Мінскага дыялогу".
Бяспека не толькі ваенная, але і эканамічная
Удзельнікі "Мінскага дыялогу" абмяркоўваюць пытанні стратэгічнай стабільнасці і кантролю над узбраеннямі, Данбас і Прыднястроўе пасля выбараў ва Украіне і Малдове, 10 гадоў "Усходняму партнёрству" і траекторыі развіцця Еўразійскага эканамічнага саюза.