Бакі канфлікту ва Украіне дамовіліся адвесці цяжкае ўзбраенне з зоны канфлікту ў раёне Аўдзееўкі да 20 лютага. Наконт гэтага па выніках пасяджэння трохбаковай кантактнай групы заявіў спецпрадстаўнік АБСЕ Марцін Сайдзік. Перагаворшчыкі канстатавалі, што сітуацыя з бяспекай на ўсходзе Украіны застаецца трывожнай і напружанай, і адзначылі, што рэжым спынення агню павінен быць устойлівым і працяглым. Эскалацыя канфлікту ў раёне Аўдзееўкі таксама стане тэмай чарговай сустрэчы ў "нармандскім фармаце". Яна можа адбыцца ў найбліжэйшы час у Мюнхене. І яшчэ адной тэмай сустрэчы кантактнай групы стала вызваленне палонных. Садзейнічанне ў гэтым пытанні бакам можа аказаць ААН.
Марцін Сайдзік, спецпрадстаўнік АБСЕ у трохбаковай кантактнай групе: "Было прынята рашэнне звярнуцца да маніторынгавай місіі ААН па правах чалавека ў Жэневе з просьбай, каб іх прадстаўнікі сталі пасрэднікамі ў працэдуры верыфікацыі жадання тых грамадзян, якія пасля вызвалення хацелі б застацца на тэрыторыі, дзе яны знаходзіліся падчас зняволення".
Дарэчы, гэта быў другі за вечар выхад Марціна Сайдзіка да прэсы. Першы сарвалі радыкалы - яны назваліся членамі незарэгістраванай расійскай партыі "Іншая Расія". Яе ўзначальвае Эдуард Лімонаў, які лічыць сябе нацыянал-бальшавіком. Хуліганаў адвяла ахова. Прадстаўнік АБСЕ пасля кароткага перапынку прадоўжыў зносіны з прэсай. Інцыдэнт пракаменціравала Міністэрства замежных спраў Беларусі.
Дзмітрый Мірончык, начальнік упраўлення інфармацыі - прэс-сакратар МЗС Беларусі: "Групай асоб, дакументаваных пашпартамі грамадзян Расійскай Федэрацыі, а таксама журналісцкімі пасведчаннямі, у прыватнасці, выдання "Русская планета", была зроблена спроба сарваць прэс-канферэнцыю спецыяльнага прадстаўніка дзеючага старшыні АБСЕ ў трохбаковай кантактнай групе па ўрэгуляванні сітуацыі на ўсходзе Украіны, пасла Марціна Сайдзіка. Названыя асобы раскідвалі лістоўкі і выкрыквалі лозунгі, якія перашкаджаюць зносінам пасла з прадстаўнікамі СМІ. У гэтай сувязі яны былі выдаленыя з прадстаўнікамі праваахоўных органаў з месца правядзення мерапрыемства. У выніку прэс-канферэнцыя адбылася, і прадстаўнікі СМІ атрымалі інфармацыю аб выніках працы трохбаковай кантактнай групы ў Мінску ў поўным аб'ёме. Прэс-служба МЗС Беларусі расцэньвае гэтае дзеянне як свядомую правакацыю, накіраваную на зрыў перагаворнага працэсу і дыскрэдытацыю мінскай перагаворнай пляцоўкі".
Як адзначыў афіцыйны прадстаўнік знешнепалітычнага ведамства, беларускі бок будзе і надалей прымаць усе меры для гарантавання бяспекі і бесперашкоднай працы трохбаковай кантактнай групы і неадкладна спыняць усе спробы перашкодзіць яе рабоце.
