Дыялог беларускага парламента і Парламенцкай асамблеі Савета Еўропы выйшаў на новы ўзровень. Такую заяву сёння зрабіў старшыня Палаты прадстаўнікоў на сустрэчы з дэлегацыяй ПАСЕ.
Гэтая аўтарытэтная міжнародная арганізацыя прыслала ў нашу краіну папярэднюю місію па назіранні за выбарамі ў парламент. Спікер ніжняй палаты Уладзімір Андрэйчанка адзначыў, што Беларусь не абмяжоўвае маніторынгавыя групы ні ў колькасным складзе, ні па працягласці працы ў краіне. Місіі ПАСЕ будзе аказана поўнае садзейнічанне. Беларускі бок спадзяецца на аб'ектыўнае заключэнне па выніках назірання і на прызнанне выбараў міжнароднай супольнасцю.
Уладзімір Андрэйчанка, старшыня Палаты прадстаўнікоў Нацыянальнага сходу Рэспублікі Беларусь: "У цэлым мы зрабілі ўсё, каб выбарчы працэс быў адкрытым, празрыстым. Пра гэта гаворыць і той факт, што ў нас да выбараў на сённяшні дзень павышаная цікавасць. Там будуць канкурыраваць розныя палітычныя погляды, палітычныя партыі і грамадскія аб'яднанні. Дастаткова сказаць, што на 110 месцаў у Палаце прадстаўнікоў на сённяшні дзень падалі заяўкі ў акруговыя выбарчыя камісіі 630 чалавек. Зараз ідзе разгляд гэтых дакументаў. 11 чысла ўжо будзе праведзена рэгістрацыя кандыдатаў у дэпутаты, якія змогуць займацца далей перадвыбарнай агітацыяй. З 630 чалавек, па-мойму, больш за 50 % - гэта прадстаўнікі палітычных партый".
Папярэдняя місія ПАСЕ па назіранні за выбарамі прыляцела ў Беларусь на чатыры дні. У складзе прадстаўнікі Арменіі, Нарвегіі, Чарнагорыі, Францыі, Польшчы, Італіі. Як адзначыў кіраўнік місіі, такая шматнацыянальная дэлегацыя экспертаў гаворыць аб жаданні даць максімальна непрадузятую і справядлівую ацэнку выбарам.
Гізела Вурм, кіраўнік папярэдняй місіі ПАСЕ па назіранні за парламенцкімі выбарамі ў Беларусі: "У нас адбылася сапраўды плённая гутарка са спікерам беларускага парламента. Мы атрымалі поўную інфармацыю аб змяненнях у вашым заканадаўстве і аб электаральнай кампаніі. І мы вельмі рады, што маем магчымасць наведаць вашу краіну за чатыры тыдні да выбараў, і можам сустрэцца, у тым ліку, і з прадстаўнікамі палітычных партый, і з работнікамі СМІ. Хочацца падзякаваць беларускаму боку за запрашэнне назіраць за выбарамі і за цёплы прыём у вашай прыгожай краіне. Мы выканаем сваю місію станоўча і справядліва, я на гэта спадзяюся".
Для маніторынгу парламенцкіх выбараў, якія адбудуцца 11 верасня, ужо акрэдытавана 303 замежныя назіральнікі і больш за 4 тысячы ўнутраных.
