Наша прадстаўніцтва з гэтага часу ёсць і ў Біярыцы - папулярным курорце на захадзе краіны. Напярэдадні ў мэрыі горада адбылася цырымонія інаўгурацыі ганаровага віцэ-консульства Беларусі.
З Атлантычнага ўзбярэжжа рэпартаж Іны Пілевіч. Мушкецёр, паляўнічы, бізнесмен. Француз Патрык Дурс зараз яшчэ і ганаровы віцэ-консул Беларусі ў Біярыцы - горадзе на Атлантычным узбярэжжы. Ён закахаўся ў нашу краіну і падахвоціўся стаць яе памочнікам пасля захапляльнай паездкі ў Белавежскую пушчу.
Патрык Дурс за ўласныя сродкі арандаваў памяшканне для віцэ-консульства. Яно размяшчаецца ў гістарычным будынку - былым гатэлі 1910 года пабудовы.
Віцэ-консульства гатовае ўдзельнічаць у арганізацыі бізнес-форумаў, прэзентацый, спрыяць падпісанню пагадненняў аб супрацоўніцтве, ды і проста дапамагаць нашым грамадзянам. Усё ж Біярыц - адно з самых вядомых і папулярных месцаў адпачынку. Логавішча сёрфінгістаў і бальнеялагічны курорт на ўзбярэжжы Біскайскага заліва.
Кароль пляжаў і пляж каралёў - так у XIX стагоддзі называлі Біярыц з-за таго, што курорт прыцягваў еўрапейскіх каранаваных асоб. Сёння высокапастаўленыя асобы тут не толькі адпачываюць. Гэта яшчэ і палітычная пляцоўка: у наступным годзе на Атлантычным узбярэжжы пройдзе саміт "Вялікай сямёркі". Праз некалькі дзён сюды прыедзе Эмануэль Макрон. Французскі прэзідэнт сустрэнецца з прадстаўнікамі дыпламатычнага корпусу, каб вызначыць прыярытэты знешняй палітыкі краіны.
Інаўгурацыя ганаровага віцэ-консульства Беларусі прайшло ў мэрыі Біярыца. Пасол Беларусі ў Францыі Павел Латушка ўручыў Патрыку Дурсу флаг і герб нашай краіны.
Ганаровае консульства ў Біярыцы ўжо чацвёртае ў Францыі, таксама прадстаўніцтвы Беларусі дзейнічаюць у Ліёне, Бардо і Марсэлі. Павышаць такім чынам пазнавальнасць нашай краіны ў Заходняй Еўропе плануюць і далей. У перспектыве - адкрыццё ганаровых консульстваў у Манака і Лісабоне
