Мінск ізноў стаў пляцоўкай для значнага міжнароднага мерапрыемства, што садзейнічае ўмацаванню стабільнасці ў рэгіёне. Беларуская сталіца прымае дэлегацыі краін Цэнтральна-Еўрапейскай ініцыятывы. На пасяджэнне Парламенцкай асамблеі ЦЕІ прыехала рэкордная колькасць удзельнікаў - 40 дэлегатаў з 13 краін. Нагадаем, наша краіна старшынствуе ў арганізацыі сёлета. І ўжо атрымала высокія ацэнкі з боку еўрапейскай супольнасці. Шматлікія ініцыятывы, якія вылучаюцца Беларуссю, актуальныя і своечасовыя. Напрыклад, стварэнне сістэмы інфармацыйнага абмену для гарантавання геапалітычнай бяспекі. Аб працы форуму - Вольга Давідовіч.
Наша краіна традыцыйна была ў авангардзе інтэграцыйных працэсаў на постсавецкай прасторы. Стаяла ля вытокаў СНД, Саюзнай дзяржавы Беларусі і Расіі, а таксама Еўразійскага эканамічнага саюза. У гэтым жа годзе атрымала статус старшыні ў Цэнтральна-Еўрапейскай ініцыятыве. Гэтае міждзяржаўнае аб'яднанне сёння фактычна выконвае ролю сувязнога звяна паміж Еўрасаюзам і краінамі Цэнтральнай і Усходняй Еўропы.
Сёння ў арганізацыю ўваходзяць 18 дзяржаў: 10 прадстаўляюць Еўрапейскі саюз, тры - гэта Беларусь, Малдова і Украіна - былыя савецкія рэспублікі. Старшынства ў ЦЕІ па праве можна назваць гістарычнай для нашай краіны падзеяй. Субрэгіянальную еўрапейскую арганізацыю Беларусь узначаліла ўпершыню. І дзейнасць рэспублікі за гэты год заслугоўвае высокай ацэнкі.
Арганізацыя была створана ў 1989 годзе для прадухілення з'яўлення новых падзяляльных ліній у Еўропе. Мэта, дарэчы, актуальная і сёння. І тут важны як палітычны аспект, так і эканамічны. Бо калі паміж краінамі ёсць моцныя гандлёвыя і вытворчыя сувязі, то і межы не ствараюць вялікіх нязручнасцяў.
Усе прыярытэты ЦЕІ - гэта і нашы беларускія прыярытэты. Таму ключавая тэма старшынства рэспублікі - гэта прасоўванне сумяшчальнасці і ўзаемадапаўняльнасці ў Вялікай Еўропе. Барацьба з тэрарызмам, сітуацыя ў сферы міграцыі, канфлікт ва Украіне.
Міхаіл Мясніковіч, Старшыня Савета Рэспублікі Нацыянальнага сходу Беларусі: "Мы вельмі рады, што Беларусь выяўляе такую ініцыятыву, і што ў гэтым кантэксце мы можам ажыццяўляць супрацоўніцтва паміж рознымі краінамі. Для Беларусі гэта стварае добрую платформу для будучыні, у тым ліку для адносін з краінамі ЕС і іншымі дзяржавамі - членамі ініцыятывы. Беларусь пераканаўча вызначае сябе як донара бяспекі ў Еўропе, чым садзейнічае глабальнай бяспецы".
Агульная тэматыка пасяджэння Парламенцкай асамблеі ЦЕІ ў Мінску - лічбавыя тэхналогіі ва ўмовах гарантавання геапалітычнай бяспекі - выбрана невыпадкова. На парадку дня нацыянальных і міжнародных пляцовак стаяць пытанні ўкаранення найноўшых тэхналогій абароны інфармацыі. Прававы інструментарый, які б дазволіў ажыццяўляць эфектыўнае рэгуляванне ў дадзенай галіне, патрэбен ужо зараз.
Сяргей Рахманаў, Старшыня Пастаяннай камісіі Савета Рэспублікі Нацыянальнага сходу Беларусі: "Тэма, якую мы абралі, яна вельмі важная, таму што закранае асновы чалавечай цывілізацыі. Калі мы няправільна выкарыстаем тыя тэхналогіі, якія ў нас ёсць, то гэта створыць пагрозы, якіх і без таго шмат. І гэта не толькі кібербяспека, гэта і інфармацыйныя войны, трансфармацыя светапогляду, замбіраванне мас насельніцтва, фарміраванне чалавека, які не можа займацца стваральнай дзейнасцю".
Беларусь на сустрэчы прапанавала выступіць платформай для міжнароднага супрацоўніцтва ў IT-індустрыі. Сёння наша краіна рухаецца па шляху ўкаранення электронных тэхналогій практычна ва ўсе сферы жыцця: ад электроннага ўрада да беспапяровага гандлю. У стадыі прапрацоўкі зараз знаходзіцца праект электроннай аховы здароўя. Фінансаванне на яго рэалізацыю выдзеліць Сусветны банк.
Вералюб Арсіч, намеснік старшыні парламента Сербіі: "Беларусь у ІТ-тэхналогіях лідзіруе ў сваім рэгіёне. Гэта з'яўляецца вельмі актуальнай сферай у развіцці эканомікі. Сербія імкнецца развіваць гэты кірунак у сваім рэгіёне. Я спадзяюся, што мы будзем супрацоўнічаць у ІТ-сферы".
Для Беларусі старшынства ў ЦЕІ - гэта не толькі высокі імідж на міжнароднай арэне, але і перш за ўсё высокая ацэнка шматвектарнага знешнепалітычнага курсу, які быў аб’яўлены Кіраўніком нашай дзяржавы. Гэта чарговае пацвярджэнне таго, што Беларусь зарэкамендавала сябе як перспектыўны і надзейны партнёр.
