Беларусь працягне ўзаемадзеянне з ЕС для поўнага скасавання санкцый

27 февраля 2017

Так у МЗС нашай краіны пракаменціравалі рашэнне Еўрасаюза падоўжыць візавыя абмежаванні ў дачыненні да чатырох грамадзян Беларусі і зброевае эмбарга. Апошняе, дарэчы, было трохі зменена. Зараз наша краіна зможа закупляць, да прыкладу, рыштунак для біятлона.

Аднак у знешнепалітычным ведамстве адзначылі, што зброевая забарона, якая захоўваецца, працягвае распаўсюджвацца на тавары, якія не маюць ніякага дачынення да заяўленых ЕС мэт. У МЗС разлічваюць на больш рашучыя меры, якія канчаткова пакінуць у мінулым палітыку ціску на Беларусь - адказнага партнёра і суседа Еўрапейскага саюза.

Дзмітрый Мірончык, начальнік упраўлення інфармацыі - прэс-сакратар МЗС Беларусі: "Мы першапачаткова зыходзім з таго, што санкцыі несправядлівыя і контрпрадуктыўныя, разлічваем, што за пазітыўным крокам Еўрасаюза па скасаванні часткі абмежаванняў, якія застаюцца, будуць прынятыя больш рашучыя меры, якія канчаткова пакінуць у мінулым палітыку ціску на Беларусь - адказнага партнёра і суседа Еўрапейскага саюза".

Нагадаем, год таму Брусель скасаваў большую частку абмежаванняў, якія дзейнічалі ў дачыненні да нашай краіны.