Сёння завяршаецца чатырохдзённы афіцыйны візіт у нашу краіну намесніка прэм'ер-міністра гэтай афрыканскай дзяржавы. Па выніках шматлікіх сустрэч у Мінску Нетумба Нандзі-Ндаітва і міністр замежных спраў Беларусі Уладзімір Макей падпісалі сумеснае камюніке. У дакуменце сумуюцца ўсе вынікі перамоў.
Намібія гатовая дапамагаць прасоўванню беларускіх тавараў на свой рынак. Асаблівая цікавасць - да закупаў машын і горназдабываючага абсталявання. Гэтая краіна валодае аднымі з найбагацейшых запасаў карысных выкапняў на кантыненце. У нетрах Намібіі знаходзяцца ўран, алмазы, медзь, золата, свінец і прыродны газ. У аграрным сектары занята прыкладна палова насельніцтва краіны. Таму афрыканская дзяржава нацэлена на стварэнне сумесных прадпрыемстваў па выпуску беларускай сельгастэхнікі.
Перамовы аб супрацоўніцтве прадоўжацца ўжо ў Намібіі. Бакі дамовіліся правесці першыя кансультацыі паміж МЗС па палітычных пытаннях у наступным годзе ў сталіцы гэтай дзяржавы - горадзе Віндхук.
