Беларусь і Арменія дыялог гатовы наладжваць на аснове павагі і партнёрства як у палітыцы, так і ў бізнесе

2 Ліпеня 2019

Наконт таго, што ў адносінах Беларусі і Арменіі  няма закрытых тэм,  ішла размова сёння  ў Палацы Незалежнасці. Аляксандр Лукашэнка і Прэзідэнт гэтай краіны Армен Саркісян  яшчэ раз адзначылі: сяброўства паміж Мінскам і Ерэванам моцнае. А гэта  добры плацдарм для эканамічнага росту. Дыялог гатовы наладжваць  на аснове павагі і ўзаемавыгаднага партнёрства. Як у палітыцы, так і ў бізнесе. З падрабязнасцямі перамоў  Вольга Макей. 

Уражаннямі аб II Еўрапейскіх гульнях прэзідэнты падзеляцца пры сустрэчы.
II Еўрапейскія гульні сабралі ў Мінску нямала VIP-гасцей. Замежныя лідары прысутнічалі і на цырымоніі закрыцця. І хаця ў нядзелю агонь у чашы "Дынама" згас, Прэзідэнт Арменіі вырашыў затрымацца ў беларускай сталіцы. У Мінска і Ерэвана шмат агульных інтарэсаў і праектаў. 
Дарэчы, зборная Арменіі ў медальным заліку  на 11-м радку з 11 медалямі, сярод якіх 5 залатых. На вышэйшую ступень двойчы паднімаліся баксёры, па разе барцы, самбісты і спартыўныя гімнасты. 
Уражаннямі аб II Еўрапейскіх гульнях прэзідэнты падзеляцца пры сустрэчы, павіншуюць адзін аднаго з паспяховымі выступленнямі атлетаў. Але пераходзячы ад спартыўнай тэматыкі да эканамічнай, Армен Саркісян нават скажа: Беларусь - чэмпіён па пэўных  напрамках. Якраз для таго, каб дэталёва вывучыць вопыт, Прэзідэнт Арменіі і застаўся ў Мінску. Зрэшты, Аляксандр Лукашэнка раіць з ад'ездам не спяшацца, прыгледзецца да ўсіх магчымасцяў супрацоўніцтва. 

У гандлі паміж краінамі  станоўчая дынаміка. 
За мінулы год нарасцілі амаль 20 %, тавараабарот у 2018-м - 50 мільёнаў долараў. А пачыналі фактычна з нуля. У Ерэване паспяхова працуе Армяна-беларускі гандлёвы дом, у нашай краіне 57 прадпрыемстваў з армянскім капіталам. Вялікая цікавасць да Беларусі і бізнесу. 

Са многімі прадпрымальнікамі Аляксандр Лукашэнка знаёмы асабіста, але нагадаў: для ўсіх, хто збіраецца інвеставаць у нашу краіну, правілы агульныя.

Арменія зацікаўлена пашыраць супрацоўніцтва і ў аграпрамысловым сектары. Патрэбныя якасныя і бяспечныя прадукты. Ужо ў найбліжэйшы час у Мінск накіруюць прадстаўнікоў профільнага міністэрства. 

У першую чаргу Прэзідэнта Арменіі цікавіць вопыт у беларускай адукацыі і IT. 
Калі паглядзець на праграму візіту Армена Саркісяна ў Беларусь, то ў першую чаргу Прэзідэнта Арменіі цікавіць вопыт у беларускай адукацыі і IT. Візіт звярстаны так, каб склалася цэласная карціна: увесь цыкл - ад падрыхтоўкі нашых спецыялістаў (напрыклад, у сферы інфарматыкі і радыёэлектронікі)  да працы Парка высокіх тэхналогій  і шырэй - дыялог з рэктарамі і прафесарамі беларускіх ВНУ.
Дарэчы, на памяць аб наведванні БДУ Армен Саркісян пакінуў малюнак (гэта Ерэванскі дзяржаўны ўніверсітэт)  - вось такі крэатыў у кнізе ганаровых гасцей. Прэзідэнт Арменіі па адукацыі фізік, гэтай сферы прысвяціў больш чым 20 гадоў, таму да навук дакладных  неабыякавы. 

Зрэшты, у Ерэване, як і ў Мінску, добра разумеюць: будучыня  за высокімі тэхналогіямі. У  часы СССР Арменію можна было лічыць саюзнай "сіліконавай далінай", але з распадам вялікай краіны раз'ехаліся і кадры. Зараз высокаінтэлектуальную сферу ў закаўказскай рэспубліцы, дзе шахматы выкладаюць нават у школе, спрабуюць аднавіць. 

У планах - стварыць свой Парк высокіх тэхналогій, таму падчас  наведвання беларускага ПВТ напярэдадні Прэзідэнт Арменіі так і сказаў: "Я тут, каб навучыцца". Віртуальная табліца Мендзялеева - гэта адукацыйны праект, электронны пашпарт лёгкіх - гэта  са сферы медыцыны і дапоўненая рэальнасць. Усё гэта напярэдадні армянская дэлегацыя ўбачыла і выпрабавала на сабе. 

Зазірнуць у будучыню можна і ва ўніверсітэце інфарматыкі і радыёэлектронікі. Тут Прэзідэнту Арменіі паказалі касмічныя распрацоўкі выпускнікоў. А вось як рыхтуюць спецыялістаў для IT-сферы і прыборабудавання,  прадэманстравалі ў лабараторыях рэсурсавага цэнтра радыётэхнічнага каледжа. Менавіта тут студэнты вывучаюць 3D-мадэляванне, асновы электронікі і прынцыпы праграмавання.

Зрэшты, сваю будучыню ў Беларусі ствараюць і армянскія студэнты. Рыма Нікагасян - адна з іх. У Мінск прыехала ў дзяцінстве і адукацыю атрымліваць вырашыла ўжо на сваёй другой радзіме. Вучыцца на юрфаку БДУ.

Не выключана, што ініцыятыва студэнткі ў будучыні спатрэбіцца. Беларусь і Арменія маюць намер нарошчваць супрацоўніцтва. Перспектыўных праектаў  шмат. Зрэшты, з Мінска Армен Саркісян вязе не толькі новыя ідэі і ўражанні, але і падарункі. Гэта сувеніры II Еўрапейскіх гульняў - пано з моранага дуба з медальёнамі па відах спорту, эксклюзіўны набор шакаладу і талісман Гульняў. У Аляксандра Лукашэнкі на памяць застанецца папірус з малітвай, які пабываў у Іерусаліме. Дарэчы, Лесік  дастанецца ўнуку Прэзідэнта Арменіі (яго таксама завуць Армен), а дзень нараджэння (так ужо супала)  3 ліпеня. З надыходзячым Днём Незалежнасці Армен Саркісян павіншаваў беларускага лідара.


Папулярныя

Рэкамендуемыя

Зараз чытаюць

Рэкамендуемыя