Сусветная супольнасць павінна прыслухацца да прапаноў беларускага боку па ўрэгуляванні канфлікту ва Украіне. Такую думку выказаў старшыня Мюнхенскай канферэнцыі па бяспецы Вольфганг Ішынгер
Вольфганг Ішынгер, старшыня Мюнхенскай канферэнцыі па бяспецы: "Мяне глыбока ўразіла тая прыхільнасць і імкненне да вырашэння канфлікту ва Украіне, якую выказаў Прэзідэнт Аляксандр Лукашэнка падчас сустрэчы, што прайшла ўчора. Мяне таксама ўразіла імкненне як мага хутчэй вырашыць канфлікт і дасягнуць міру на ўсходзе Украіны. Я спадзяюся, што да тых цікавых прапаноў, якія былі выказаныя, уключаючы і місію на ўсходзе Украіны, прыслухаецца міжнародная супольнасць".
Аб тым, што Мінск - гэта брэнд, які звязаны са стабільнасцю, заявіў Прэзідэнт Арменіі. Армен Саркісян таксама закрануў і тэму двухбаковых адносін. На думку армянскага лідара, Мінск і Ерэван могуць сур'ёзна нарасціць тавараабарот. Для гэтага ў нашых краін вялізны патэнцыял.
Армен Саркісян, Прэзідэнт Арменіі: "Мы абмеркавалі шматлікія пытанні, звязаныя з адносінамі паміж Беларуссю і Арменіяй. Гэта і эканамічныя задачы, якія перад намі стаяць, паколькі абодва прэзідэнты думаюць, што ў нас вялікі прагрэс у гэтых адносінах але, з другога боку, таксама вялізны патэнцыял. І ў розных кірунках. Адна з мэт маёй паездкі сюды - знайсці тыя кірункі, дзе мы больш глыбока можам супрацоўнічаць. Абмяркоўвалі мы яшчэ і той факт, што Беларусь сапраўды з'яўляецца фактарам стабільнасці ў рэгіёне".
Паводле слоў Прэзідэнта Арменіі, пасяджэнне ўдала закранае многія праблемы і задачы, якія стаяць і перад Еўропай, і перад Азіяй.