На адным з участкаў Мінска - у сярэдняй школе № 1 - у гэтыя хвіліны працуе наш карэспандэнт Аляксей Адашкін (прамое ўключэнне).
Мы зараз знаходзімся ў сярэдняй школе № 1 Мінска. Яна адносіцца да Чкалаўскай выбарчай акругі. Адразу 7 чалавек прэтэндуюць на месца ў парламенце ад гэтага раёна. Гэта адзін з самых высокіх конкурсаў сярод кандыдатаў у маштабах усёй краіны. Бо ў сярэднім па рэспубліцы заваяваць сімпатыі і атрымаць галасы выбаршчыкаў спрабуюць па 4 з паловай чалавекі.
Колькасць кандыдатаў робіць гэту палітычную кампанію самай актыўнай за апошні час. Для параўнання, у 2008 конкурс на месца заканадаўца быў удвая меншым. З 7 чалавек, якія хочуць стаць дэпутатамі ад Чкалаўскай акругі, ёсць дзве жанчыны. Што тычыцца прафесійнага складу, то ў спісе дырэктар камерцыйнай кампаніі, кіраўнік прадпрыемства, дэпутат пятага склікання, індывідуальны прадпрымальнік, дацэнт ВНУ і тэхнік-электронік. Як не разгубіцца ад такой разнастайнасці і выбраць лепшага з кандыдатаў - пра гэта мы пагаварылі з выбаршчыкамі, якія ўжо аддалі свае галасы.
У Чкалаўскай акрузе амаль 64 тысячы выбаршчыкаў. Сёння на галасаванне мясцовыя жыхары ішлі як на свята. Адміністрацыя школы пастаралася зрабіць так, каб на ўчастку можна было не толькі скарыстацца сваім канстытуцыйным правам, але яшчэ і смачна паесці, і дакрануцца да прыгожага. Кожную гадзіну тут канцэрты. Выступаюць вучні школы і самі выкладчыкі. На ўчастку працуюць і назіральнікі.
Выбаршчыкі ідуць даволі актыўна. Але тут на ўчастку нам распавялі, што пік наведвальнікаў па традыцыі чакаецца бліжэй да вечара. Сёння цудоўнае надвор'е, шматлікія за горадам. Але да канца дня ўсе вернуцца ў Мінск і прыйдуць галасаваць.
