"Зубраня" сёння адзначае 47-ы дзень нараджэння

17 Жніўня 2016

Вядомы дзіцячы аздараўленча-адукацыйны цэнтр "Зубраня" сёння адзначае 47-ы дзень нараджэння. Лагер пачынаўся з аднаго корпуса на 160 месцаў, а сёння стаў самым буйным дзіцячым курортам у Беларусі. За адну змену прымае звыш тысячы дзяцей. Віншаванні на адрас імянінніка гучаць не толькі на беларускай мове - паштоўкі дасылаюць выхаванцы "Зубраняці" з усяго свету. Да віншаванняў далучыўся Ян Пашкевіч.

Хоць Аляксей Родзікаў і наведвае лагер "Зубраня" не менш чым 3 разы на год, але вывучыць лясны гарадок яшчэ не паспеў. За гэты час хлопец пазнаёміўся з гераічнай спадчынай Беларусі на сцежках мужнасці ў мясцовым скверы, спрабаваў сябе ў творчасці у мастацкіх гуртках. Сёлета ж - у алімпійскае лета - аддаў перавагу спорту. Чарговым адкрыццём для Аляксея стала сучасная варкаўт-пляцоўка.

Амаль паўстагоддзя таму ўвесь лагер складаўся толькі з жылога корпуса на 160 месцаў. Сёння ж гэта велізарны мегаполіс, на вуліцах якога вырасла звыш 150 будынкаў, а за змену яго жыхарамі становіцца больш чым 1000 дзяцей. Лагер нават падзелены на адмысловыя мікрараёны - Азёрны, Блакітны, Сонечны горад, Зорны свет і Лясны дом. З нядаўняга часу да іх далучыўся і Вясёлкавы - ужо пабудаваныя тры з шасці домікаў.

Тут жа побач з дзецьмі жывуць звыш дзесяці розных відаў жывёл у невялікім заказніку. Сярод іх камерунская каза, янотападобны сабака і самыя папулярныя - маленькія трусяняты.

Лагер "Зубраня", які зліўся з маляўнічымі пейзажамі Нарачанскага парку, ўвабраў у сябе ўсе скарбы беларускай зямлі. У велізарным скверы засталіся партызанскія сцежкі, прадэманстраваная ваенная тэхніка і іншыя пасведчанні гераічнага мінулага нашай краіны. Побач - адноўлены сялянскі хутар сярэдзіны 19-га стагоддзя, дзе ладзяць падарожжа па гісторыі і традыцыях роднай зямлі.

Штогод у лагеры абнаўляюць і медыцынскі цэнтр. За дзень сеансы гідрамасажу, ароматэрапіі або жамчужныя ванны наведваюць амаль 800 дзяцей.

Італьянцы, японцы, англічане - у дзіцячым гарадку нярэдка можна пачуць звыш 40 моў свету. Міжнародныя праграмы ў аздараўленчым цэнтры адбываюцца штогод. Акрамя таго, летам арганізуюць "марскія змены" ў Балгарыі для маленькіх беларусаў. Сёлета ж з'явіўся яшчэ адзін гарачы напрамак - Італія. А месяц таму "Зубраня" заключыў пагадненне аб супрацоўніцтве з Дзіцячым фондам ААН.

Дзіцячы гоман і смех у нацыянальным цэнтры не змаўкае круглы год - падчас вучэбнай пары ладзяць спецыялізаваныя праграмы для юных ратавальнікаў, фізікаў, спартсменаў. Усяго ж грамадзянамі вялікага ляснога горада за год становяцца звыш за 16 тысяч дзяцей.