З першага снежня ўсе аўтамабілісты абавязаныя пераабуцца. Нагадаем, выкарыстоўваць гуму з зімовым малюнкам пратэктара неабходна з 1 снежня па 1 сакавіка. За парушэнне ПДР прадугледжана папярэджанне або штраф больш як 10 рублёў. А для вадзіцеляў на першым месцы павінна стаяць пытанне бяспекі. У сувязі з пагаршэннем надвор'я толькі за апошнія дні павялічылася колькасць ДТЗ, у якіх людзі атрымалі сур'ёзныя траўмы.
На МКАД аўтамабіль "аўдзі" ўрэзаўся ў асвятляльную мачту. Па даных ДАІ, машына ехала ў сярэдняй паласе. Пры перастройванні ў крайні правы рад, вадзіцель не справіўся з кіраваннем, і аўто занесла, машына ўрэзалася ў слуп. Пасажыру спатрэбілася дапамога ўрачоў. Працаўнікі дарожнай міліцыі нагадалі аўтамабілістам і аб дыстанцыі, якую ў такіх умовах надвор'я неабходна павялічыць.
Станіслаў Салавей, старшы інспектар па асаблівых даручэннях УДАІ МУС Беларусі: "З першага снежня вадзіцелі павінны рухацца на аўтамабілях, на якіх усталяваныя зімовыя шыны. Нагадаю, гэта тыя, на якіх ёсць адна з трох маркіровак: гара з трыма пікамі і сняжынкай усярэдзіне, калі ёсць літары м і s, або надпіс all seasons. У такіх умовах надвор'я вадзіцелі павінны разумова павялічваць дыстанцыю да транспартнага сродку, які ідзе наперадзе, у некалькі разоў, быць уважлівымі пад'язджаючы да пешаходных пераходаў. Многія пешаходы не пераконваюцца ў бяспецы пераходу, а вадзіцель не можа затармазіць імгненна".
Варта адзначыць, вадзіцелям трэба пракантраляваць і вышыню пратэктара зімовых шын, яна павінна быць не менш як 4 мм.
