Журналісты расійскіх СМІ наведалі стадыён "Дынама" і Парк высокіх тэхналогій

13 Снежня 2018

Важкі ўклад ва ўмацаванне сувязяў Саюзнай дзяржавы ўносяць і прадстаўнікі СМІ абедзвюх краін. Вынік іх працы адлюстроўваецца ў сюжэтах і матэрыялах. Свой погляд на Беларусь гэтымі днямі складаюць каля сотні журналістаў расійскіх рэгіёнаў. Прэс-тур нашых калег па беларускай зямлі працягваецца. Сёння госці ўбачылі галоўную арэну будучых II Еўрапейскіх гульняў - абноўлены стадыён "Дынама". Чым здзівіць гасцей цырымонія адкрыцця спартыўнага форуму, хто са знакамітых атлетаў прыедзе ў Беларусь, за кошт чаго можна павысіць акупнасць спартыўных аб'ектаў. Пра гэта і не толькі журналісты пагутарылі з профільным міністрам. Эмоцыі і ўражанні ў рэпартажы Станіслава Ліпскага.

Напярэдадні маскоўскі ЦСКА пад кіраўніцтвам беларуса Віктара Ганчарэнкі ў Мадрыдзе разграміў мясцовы "Рэал", 3-0, у рамках Лігі чэмпіёнаў. Гэта паражэнне стала самым буйным у еўракубках для "сметанковых". Зразумела, пра гэту легендарную перамогу мы проста не маглі не пагаварыць з расійскімі журналістамі. Тым больш што выпала цудоўная магчымасць, тым больш знаходзячыся ў адпаведным антуражы. Сёння прадстаўнікі СМІ нашых усходніх суседзяў у рамках прэс-тура наведалі   сталічны стадыён "Дынама".

Не менш, а ў некаторых журналістаў нават больш эмоцый (напрыклад, ва Уладзіміра Чарнышова) выклікалі ўбачаныя ў прэс-туры прамысловыя і спартыўныя аб'екты. У Беларусь рэпарцёр прыехаў з Хабараўскага края.

Журналістам з Расіі сёння даступныя ўсе куткі спарткомплексу - падчас экскурсійнага марафону піт-стоп ажыццяўляем у ВІП-ложы стадыёна "Дынама".

Адразу пасля экскурсіі прэс-канферэнцыя. Галоўная тэма - II Еўрапейскія гульні. Дарэчы, талісман форуму лісяня Лесік сёння ў карэспандэнтаў нарасхват. Атрымаўшы канкрэтны адказ на пытанне, журналісты цікавяцца, чаму ў краіне такая каласальная ўвага спорту.

Стадыён "Дынама" працягвае падрыхтоўку да Еўрапейскіх гульняў. Зусім хутка ў арэны з'явіцца ахоўнае пакрыццё, якое будзе выкарыстана падчас цырымоніі адкрыцця. Ім накрыюць і газон, і бегавыя дарожкі.

Пра курс, узяты на пабудову IT-краіны, паспелі напісаць шматлікія з гэтых расійскіх журналістаў. Сёння яны змаглі ўбачыць цэнтр лічбавай эканомікі ўжывую. Беларускае Сколкава – так называюць між сабою Парк высокіх тэхналогій мае калегі, але прызнаюцца: наш аналаг змог здзівіць. У аб'ектыве камер - віртуальная рэальнасць, зарадныя станцыі для электрамабіляў, дадаткі для медыцынскага кантролю і проста для забавы. Таццяна Ермаліцкая прадстаўляе Томск, студэнцкую і навуковую сталіцу Сібіры. Пры кожным універсітэце тут працуе свой бізнес-інкубатар. Добрых распрацовак шмат, але далёка не кожная аказваецца перспектыўнай. Парк высокіх тэхналогій у гэтым сэнсе - прыклад паспяховай рэалізацыі ІТ-праектаў.

Расійскім журналістам паказалі і сучасную сістэму бяспекі, якая аб'ядноўвае 1200 камер па ўсім Мінску. Дарэчы, да Еўрапейскіх гульняў іх колькасць будзе павялічана.

Заўтра госці з Расіі змогуць распавесці аб уражаннях ад падарожжа па Беларусі і задаць свае пытанні Аляксандру Лукашэнку. Як паведамілі ў прэс-службе Прэзідэнта, Кіраўнік дзяржавы ў пятніцу правядзе сустрэчу з прадстаўнікамі расійскай медыясупольнасці.

 


Папулярныя

Рэкамендуемыя

Зараз чытаюць

Рэкамендуемыя