Жыхары вёскі Пукшына Віцебскага раёна скардзяцца на небяспечнага суседа. Вяскоўцаў палохае буры мядзведзь. Сляды звера сталі заўважаць яшчэ восенню, зімой ён не парушаў іх спакой, а пасля выхаду са спячкі стаў зноў з'яўляцца на падворках. Касалапага часта бачылі побач з хатамі і мясцовай фермай. Людзі б'юць трывогу, не ведаюць, як засцерагчы сябе ад мядзведзя. Марына Раманоўская разбіралася ў сітуацыі.
Тое, што мядзведзі дрэнныя суседзі, Аляксей Ігнацьеў пераканаўся асабіста. Жыхар вёскі Пукшына сустрэў касалапага ноччу. Але не спалохаўся: мядзведзь нават здаўся яму дружалюбным. У гонар такога незвычайнага знаёмства мясцовы жыхар вырашыў пачаставаць яго варэннем. Толькі вось сілы свае не разлічыў. Як вынік - бальнічная палата.
Гісторыю Аляксея Ігнацьева добра ведаюць не толькі суседзі па палаце. У вёсцы гавораць: сустрэча з небяспечным зверам для мужчыны магла скончыцца больш сумна.
Дзмітрый Жукоўскі добра памятае тое месца, дзе адбылася няроўная сутычка. Менавіта ён прыбег ратаваць чалавека ад мядзведзя.
Людзі распавядаюць: таму, што ў лесе побач з вёскай водзяцца мядзведзі, не здзіўленыя.
Але сустрэць небяспечнага звера побач з хатамі ніяк не чакалі. Бачылі касалапага і недалёка ад мясцовай фермы. І зараз маршрут ад дома да працы тут лічаць небяспечным.
Як толькі мядзведзь выйшаў з зімовай спячкі, у жыхароў вёскі пачалася бяссонніца. Суседства з дзікім зверам палохае ўсю акругу.
Мясцовыя жыхары распавядаюць: сляды няпрошанага госця сталі заўважаць яшчэ восенню. Бачылі касалапага ў наваколлях адразу некалькіх вёсак. І ўжо тады, пераконваюць людзі, мядзведзь не саромеўся заходзіць на падворкі.
На думку спецыялістаў, у вёсцы гаспадарыць малады самец. Страляць у дзікага звера забаронена. Буры мядзведзь - чырванакніжнік. Няпрошанага госця праганяюць шумам.
Ці спалохаўся мядзведзь, мясцовым жыхарам застаецца толькі здагадвацца. На ўсялякі выпадак людзі імкнуцца лішні раз не выходзіць вечарам на вуліцу. І зараз ужо дакладна ведаюць: сустрэўшы касалапага суседа, частаваць варэннем яго не варта.