З падрабязнасцямі - Улада Карніцкая.
Сістэму аплаты працы мадэрнізуюць ужо сёлета. Мабыць, гэта галоўная навіна, якую сёння агучыла журналістам кіраўніцтва Міністэрства працы і сацабароны краіны. Размова, у першую чаргу, ідзе пра бюджэтнікаў.
Адзін з галоўных прынцыпаў, які ляжа ў аснову абсалютна новага механізму, - індывідуальны падыход да кожнага працаўніка. А сама зарплата будзе складацца з дзвюх частак: тое, што будзе даваць дзяржава праз тарыфную стаўку першага разраду, і тое, што праз свае нарматыўныя акты працадаўца вызначыць для кожнага пэўнага супрацоўніка ў залежнасці ад эфектыўнасці яго працы. Па меркаванні спецыялістаў, менавіта кіраўнікі як ніхто іншы могуць аб'ектыўна ацэньваць якасць выкананай працы, і з улікам спецыфікі той або іншай прафесіі.
Адпаведны законапраект спецыялісты плануюць распрацаваць на працягу паўгода. Пры гэтым у Мінпрацы і сацабароны падкрэсліваюць, што працаваць над дакументам будуць прадстаўнікі ўсіх зацікаўленых міністэрстваў і ведамстваў.
Яшчэ адзін кірунак работы ведамства - у сацыяльна-арыентаванай дзяржаве - удасканаленне механізму па падтрымцы сем'яў. І гэта работа вядзецца ў рэжыме нон-стоп. Адзін з самых доўгачаканых вынікаў таксама агучылі сёння: упершыню за апошнія 20 гадоў у жніўні мінулага года пачаўся абсалютны прырост насельніцтва. Ужо ў снежні нас было на чатыры тысячы больш, чым яшчэ ў студзені 2013.
Аляксандр Румак, намеснік Міністра працы і сацыяльнай абароны Беларусі: Такія тэндэнцыі з'явіліся вынікам комплекснай работы ўрада Прэзідэнта РБ па падтрымцы сем'яў, якія выхоўваюць дзяцей. Гэта і павелічэнне дапамог сем'ям, якія выхоўваюць дзяцей з 1 студзеня 2013 года. Гэта льготы ў будаўніцтве жылля для маладых сем'яў.
А вось пра планы па падтрымцы пенсіянераў нашаму каналу распавяла ўжо Міністр працы і сацыяльнай абароны Мар'яна Шчоткіна ў эксклюзіўным інтэрв'ю. Павышацца пенсіі будуць, як і раней, з улікам росту прыбыткаў, змены бюджэту пражытачнага мінімуму і прыбыткаў фонду сацыяльнай абароны. Акрамя таго, у так званым экспартным спісе пенсійнага забеспячэння сёлета плюс яшчэ адзін пункт.
Пагадненне, якое дае магчымасць сцерці межы ў гэтым пытанні паміж нашай краінай і Азербайджанам, ужо падпісана.
Ужо 5 студзеня, у Дзень работнікаў сацыяльнай абароны, Мар'яна Шчоткіна стане госцем выніковай інфармацыйна-аналітычнай праграмы У цэнтры ўвагі. Калі дакладна чакаць першага павышэння пенсій і дапамог сёлета, якая рэальная сітуацыя на рынку працы, і хто зможа разлічваць на сур'ёзную фінансавую падтрымку дзяржавы да 70-годдзя вызвалення Беларусі. Пра гэта і многае іншае вы даведаецеся ўжо ў найбліжэйшую нядзелю, уключыўшы роўна ў дзевяць гадзін вечара Беларусь 1 або Беларусь 24.
