Чым вышэйшыя цэны, тым большая цікавасць кліентаў: некаторыя кампаніі аддаюць перавагу працаваць менавіта па такой схеме.
Супрацоўнікі дзяржкантролю сумесна з міліцыяй раскрылі факты неабгрунтаванага пасрэдніцтва пры закупках запчастак для аўтамабіляў і спецтэхнікі. Паводле звестак ведамства, такім чынам працаваў Рагачоўскі лясгас. За паўгода арганізацыя выдаткавала на закупку камплектуючых да тэхнікі больш за 52 тысячы рублёў. Прадукцыю лясгас набываў у індывідуальнага прадпрымальніка. Закупка праз пасрэдніка павялічвала кошт тавара ў 2-3 разы. Як вынік - прадпрыемства пераплаціла каля 24 тысяч рублёў.
Сяргей Глоба, начальнік упраўлення Камітэта дзяржкантролю Беларусі па Гомельскай вобласці: "Дагавор лясгаса на пастаўку з індывідуальным прадпрымальнікам быў падпісаны без вывучэння рынку прапаноў па гэтых запчастках, аб чым сведчаць такія факты, што той ІП, з якім заключаны дагавор, купляў аўтазапчасткі ў першага імпарцёра і ў гэты дзень адгружаў тавар лясгасу, але па цэнах вышэйшых у 2-3 разы".
Матэрыялы праверкі перададзены праваахоўнікам для дачы прававой ацэнкі дзеянняў прадстаўнікоў лясгаса.
