За апошні год калектыўны дагавор стаў у Беларусі сапраўдным трэндам: з мая 2015-га ў нашай краіне створана больш за тысячу пярвічных арганізацый у прыватных кампаніях. Напрыклад, у 2013-м і 2014-м гадах такіх дагавораў было заключана ў 5 разоў менш. І гэта лёгка тлумачыцца - прэміі тым, хто не курыць, скідкі на медпаслугі, лагеры для дзяцей і жыллё па-за чаргой. На некаторых прадпрыемствах прафсаюзны рух літаральна дазваляе супрацоўнікам пачаць новае жыццё.
Аляксандр Жук пяць гадоў пражыў у Віцебскай вобласці, потым два гады ў Радашковічах. І толькі некалькі месяцаў таму домам для яго сям'і стаў пасёлак Шаршуны. Мужчына з жонкай заўсёды хацелі жыць не сярод гарадскога шуму, а на прыродзе. Тут, недалёка ад Мінска, акрамя спакою знайшлася цікавая праца, школа для старэйшых дзяцей, сад для малога, а галоўнае - жыллё.
Год таму тут на прадпрыемстве арганізавалі свой прафсаюз. Разам з ім прыйшлі і бонусы для работнікаў: бясплатны басейн, выхадны 1 верасня, дадатковая дапамога да нараджэння дзіцяці і летнія лагеры для дзяцей са скідкай. Акрамя таго, прафсаюзы дапамагаюць з транспартам. Калі супрацоўнікі прадпрыемства хварэюць, іх адвозяць у сталічныя бальніцы, а потым забіраюць дамоў.
Пошук неабходных кадраў для гаспадаркі праходзіць па ўсіх кутках краіны. Акрамя працы, кожны супрацоўнік тут, як і сям'я Аляксандра Жука, атрымлівае жыллё.
Для работнікаў прадпрыемства ўжо пабудавалі 10 дамоў. Ужо зусім хутка будуць здадзеныя яшчэ 4. Для тых, хто прыязджае з іншых рэгіёнаў, жыллё выдзяляецца па-за чаргой. Так, у Шаршунах толькі сёлета ўжо пасяліліся 4 сям'і.
А ў гэтай фірме калектыўнае пагадненне працуе ўжо 4 гады. Сярод ужо звыклых пунктаў ёсць адзін незвычайны - прэмія тым, хто не курыць. Штомесяц такія работнікі атрымліваюць 50 дадатковых рублёў. Ад шкоднай звычкі ўжо адмовіліся 40% супрацоўнікаў. Прычым некаторыя з іх дагэтуль курылі больш чым 10 гадоў.
У калектыўных пагадненнях розных фірмаў ёсць свае асаблівыя пункты. Агульныя праекты прафсаюзаў у розных кампаніях дазваляюць удзельнікам руху эканоміць на паслугах, напрыклад, мабільных аператараў. Скідкі даюцца ў турфірмах, хімчыстках, забаўных цэнтрах і нават у прыватных клініках. Некаторыя прадпрыемствы аплачваюць сваім супрацоўнікам палову кошту абедаў і праезду.
