Школьны бізнес, які працуе. Юныя прадпрымальнікі Мінскай вобласці прадэманстравалі свае дзелавыя распрацоўкі. У фінал фестывалю “Школа прадпрымальніцтва” прайшлі толькі шэсць лепшых стартапаў. Экалагічны праект з эканамічным эфектам, дызайн пакояў для падлеткаў, аграсядзіба з анімацыяй і платформа для афлайн- і анлайн-тэсціравання.
З ініцыятыўнай моладдзю сустрэлася Юлія Токар. Выпускніцы Пліскай школы Смалявіцкага раёна – дзве Вікторыі: Рагожына і Юркевіч - паказваюць прафарыентацыйную карту. На ёй некалькі дзясяткаў пытанняў, якія дапамагаюць вызначыць творчыя схільнасці, інтарэсы і эрудыцыю школьніка. На апрацоўку такіх анкет псіхолагу патрэбныя мінімум два месяцы. Праект дзяўчат дазволіць значна паскорыць дыягностыку.
Платформа для афлайн- і анлайн-тэсціравання стала адным з лепшых стартапаў Мінскай вобласці. Праект "Pro-псіхолаг" ужо выкарыстоўваюць не толькі ў школах і ўніверсітэтах, але і ў бізнес-кампаніях.
Яшчэ адзін фіналіст фестывалю "Школа прадпрымальніцтва" - Тeen disign. Стварыць арт-планіроўку пакоя для падлеткаў вырашылі старшакласнікі Лошніцкай гімназіі Барысаўскага раёна. Юныя дызайнеры распрацавалі стыльны інтэр'ер у 3D-мадэлі.
Навыкі прадпрымальніцтва аўтары стартапа атрымалі ў школьным бізнес-інкубатары. У Барысаўскім раёне адукацыйны пілотны праект запусцілі ўсяго чатыры месяцы таму, а смелыя распрацоўкі падлеткаў ўжо становяцца лепшымі ў рэгіёне. Тeen disign, "Pro-псіхолаг", экалагічны праект з эканамічным эфектам, а яшчэ аграсядзіба з графічнымі інсталяцыямі і мабільны дадатак для фермерскай гаспадаркі - шэсць лепшых стартапаў школьнікаў вызначылі ў Мінскай вобласці. Конкурсны этап для іх прадоўжыцца ўжо на рэспубліканскім узроўні, а яшчэ кожная каманда атрымае майстар-клас па маркетынгу і манетызацыі свайго бізнесу ў "Школе прадпрымальніцтва".
Юныя прадпрымальнікі Мінскай вобласці прадэманстравалі свае дзелавыя распрацоўкі
21 мая 2019