Джэнет Ачылава, калі заканчвала школу ў Баку, ужо ведала, што атрымліваць вышэйшую адукацыю яна паедзе ў Беларусь. Яшчэ з дзяцінства, прызнаецца, цікавілася дакладнымі навукамі. Больш за ўсё сябравала з матэматыкай. Калі настаў час вызначацца, паступіла на эканамічны факультэт, не раздумваючы ні секунды.
Джэнет Ачылава, выпускніца эканамічнага факультэта БДУ (Туркменістан): Пяць гадоў вучобы. Бяссонныя ночы падчас сесій і складаныя экзамены, курсавыя, вытворчыя практыкі. Усё было вельмі складана, але зараз я ўсё гэта ўспамінаю з сумам, таму што я б вельмі хацела вярнуць свае студэнцкія гады назад.
І ў свой апошні студэнцкі вечар яна - гаспадыня цырымоніі. На сцэне перад тысяччу чалавек аб'яўляе імёны тых, хто ўжо зусім хутка свае адзнакі ў атэстаце праверыць на рэальным рабочым месцы ў Беларусі ці ў сябе на радзіме.
Сяргей Абламейка, рэктар БДУ: Гэта важна вельмі, таму што людзі, правучыўшыся ў нас, едуць дамоў, і ў іх назаўжды застаецца ў душы, у сэрцы любоў да Беларусі, любоў да Беларускага дзяржаўнага ўніверсітэта.
Ергалі Булегенаў, Надзвычайны і Паўнамоцны Пасол Казахстана ў Беларусі: Вельмі радуе, што гэтая ВНУ як бы інтэрнацыянальная. Я ведаю, што сёння тут вучацца прадстаўнікі 14-ці дзяржаў свету. І гэта таксама гаворыць аб тым, што адукацыя ў Беларусі вельмі якасная, добрая і запатрабаваная.
І ў гэтым ужо даўно ніхто не сумняваецца. Атрымліваць беларускую адукацыю ў Мінск прыязджаюць абітурыенты з Турцыі, Японіі, Кітая і нават Егіпта - усяго 44 краіны. Напрыклад, толькі ў БДУ вучацца каля 3 тысяч замежных студэнтаў. І з кожным годам іх колькасць пастаянна расце.
Як паказвае практыка, часцей за ўсё замежныя абітурыенты ў БДУ выбіраюць факультэт міжнародных адносін. Гэты выпуск не выключэнне. Самымі запатрабаванымі вучэбнымі напрамкамі ў іншаземцаў сёлета таксама сталі эканоміка і журналістыка.
Для многіх замежных студэнтаў гэты баль толькі паўза ў вучобе. Большасць з іх застануцца ў Беларусі яшчэ на некалькі гадоў для таго, каб прайсці навучанне ў магістратуры і аспірантуры вядучага ўніверсітэта краіны. Што да астатніх, то яны запэўніваюць, што з такой адукацыяй знайсці добрыя рабочыя месцы ў сваёй краіне ім будзе няцяжка.
