"Увод Беларускай АЭС з'яўляецца жыццёва важным укладам на шляху да ўстойлівай і нізкавугляроднай энергетыкі", - заявілі ў Сусветнай ядзернай асацыяцыі.
"Далучэнне Беларусі да ліку краін, якія выкарыстоўваюць ядзерную энергію для вытворчасці чыстай, надзейнай і рэнтабельнай электраэнергіі пазітыўна адаб'ецца на сусветнай энергетычнай галіне і дазволіць пазбегнуць больш чым 18 млн тон штогадовых выкідаў вуглякіслага газу", - адзначаецца ў дакладзе арганізацыі. З запускам АЭС у Астраўцы Беларусь становіцца дзяржавай з уласнымі крыніцамі энергіі.
А гэта цалкам новая рэальнасць, якая будзе задаваць тон на эканамічнай карце рэгіёна. Такім меркаваннем з нашым тэлеканалам падзяліўся дацэнт кафедры палітычнай тэорыі МДІМА Кірыл Коктыш.
Беларуская АЭС - уклад у забеспячэнне энергетычнай незалежнасці
У суботу даць старт першай айчыннай атамнай станцыі ў Астравец прыехаў прэзідэнт. Першы энергаблок вывелі на новую магутнасць у 400 мегават. Другі плануюць запусціць у 2022-м - тады АЭС дазволіць забяспечыць 40% унутраных патрэбнасцяў у электрычнасці. Ужо зараз мы атрымалі стабільную і экалагічна чыстую крыніцу энергіі, якая гарантуе краіне энергетычную бяспеку. Да таго ж, праект адкрывае новыя магчымасці ў шматлікіх сферах - ад прамысловасці да медыцыны і адукацыі.
Кацярына Рэчыц, аналітык БІСД: "Трэба разумець, што наяўнасць атамнай электрастанцыі - гэта не проста забеспячэнне нацыянальнай энергетычнай бяспекі. Гэта цэлы комплекс іншых выгод, якія даюць тыя самыя перавагі. І магчымасць перайсці да новага тэхналагічнага ўкладу, і магчымасць развіваць індустрыяльную эканоміку. Гэта ўклад у барацьбу са змяненнем клімату і такі інструмент для навуковага, кадравага патэнцыялу. Таму ўвод у эксплуатацыю АЭС - гэта не проста энергія як рэсурс, а энергія для росту ў разнастайных кірунках для нашай краіны".
Беларусь папоўніла спіс краін, якія выкарыстоўваюць мірны атам для забеспячэння ўласных патрэбнасцяў. Усяго ў клубе ядзернай энергетыкі ледзь больш як 30 дзяржаў. Сярод іх і перадавыя эканомікі свету - ЗША, Кітай, Францыя, Японія і Расія.
