Зразумела, самім паняццем донарства сёння нікога не здзівіш, але вось да таго, каб даваць яе, не патрабуючы нічога ўзамен, гатовы далёка не ўсе. А між тым, Сусветная арганізацыя аховы здароўя заклікала ўсе краіны да 2020 года перайсці на сістэму рэгулярнага добраахвотнага донарства крыві. Дарэчы, для 62-юх краін свету гэта ўжо практыка. І вось далучыцца да іх ліку плануюць і ў Беларусі. Першымі прыклад паказалі медыкі на чале з міністрам, а вось сёння і мае калегі.
Якія матывы прымушаюць чалавека дзяліцца часцінкай сябе дзеля іншых, раскажа Улада Карніцкая. У Беларусі сёння амаль 80 тысяч кадравых донараў крыві. Да іх ліку напярэдадні Сусветнага дня донара крыві далучыліся вядучыя і журналісты Агенцтва тэленавін Белтэлерадыёкампаніі. Дарэчы, без эмоцый не абышлося. Добраахвотна і бязвыплатна ў гарадскім цэнтры трансфузіялогіі тэлевізійная дэлегацыя здала некалькі літраў крыві, а гэта, як мінімум, некалькі выратаваных жыццяў.
Дзмітрый Лукша, вядучы праграмы Зона Х: Прыемна, што і я, і мае калегі прыйшлі здаць кроў бязвыплатна. Я думаю, што больш важна, што ты вырашыў дапамагчы камусьці. Ты не ведаеш гэтага чалавека і не атрымаеш за гэта грошай. Ты сапраўды па клічы сэрца, душы вырашыў камусьці дапамагчы.
Алена Насачова, вядучая праграмы Навіны: Самай галоўнай каштоўнасцю з'яўляецца жыццё. Мы так марнуем свае сілы. П'ём адзін у аднаго кроў. Калі ёсць магчымасць падзяліцца гэтай крывёй і выратаваць хаця б адно адзінае жыццё, я думаю, што гэта добрая справа і яе варта падтрымаць.
Спецыялісты сцвярджаюць, што дзяліцца крывёй нават карысна. Па статыстыцы донары жывуць даўжэй і менш хварэюць, у тым ліку анкалагічнымі і сардэчна-судзістымі захворваннямі. Рэгулярная здача крыві спрыяе падаўжэнню маладосці, бо стымулюе крывятварэнне і самаабнаўленне арганізма. Адна доза крыві - гэта 450 мілілітраў. Дарэчы, гэта ўсяго толькі 10% ад той крыві, якая цыркулюе па нашым арганізме. Яна паступае вось у такі гемакантэйнер. На ім ёсць штрыхкод, на якім напісана ўся інфармацыя, хто здае гэтую кроў.
Беларусь забяспечвае сябе запасам крыві на 100% самастойна. Толькі за 2012 год было нарыхтавана амаль 150 тысяч літраў кампанентаў крыві. А гэта амаль 160 тысяч выратаваных жыццяў беларусаў. З кожным годам колькасць кадравых донараў у Беларусі павялічваецца на паўтары - дзве тысячы. Прычым, медыкі адзначаюць тэндэнцыю амаладжэння нашых запасаў крыві, бо 20 % з іх - донары ва ўзросце да 30 гадоў.