Пытанні ў шляху: ацэньваем бяспеку беларускіх дарог

У аўтамабілістаў зараз таксама момант, калі не да адпачынку. Надвор'е на гэтым тыдні не радавала. Прыйшла сапраўдная восень з дажджамі. Адсюль і рост ДТЗ. Іграе ролю не толькі няўважлівасць вадзіцеляў, але і недасканаласць дарожнай інфраструктуры. На жаль, гэта не рэдкасць.

Паводле статыстыкі Сусветнай арганізацыі аховы здароўя, смяротнасць у выніку дарожна-транспартных здарэнняў штогод толькі расце. У сярэднім на дарогах гінуць 1 мільён 350 тысяч чалавек. Траўмы, атрыманыя ў выніку ДТЗ, - галоўныя прычыны гібелі дзяцей і маладых людзей ва ўзросце ад 5 да 29 гадоў. А яшчэ 26 % усіх смерцяў на трасе - гэта пешаходы і веласіпедысты.

Калі гаварыць аб Беларусі, то за 10 гадоў колькасць ДТЗ знізілася ўдвая. І амаль у 2 з паловай разы паменшылася смяротнасць. Да таго ж рэгулярна з'яўляюцца ініцыятывы, якія прымушаюць задумвацца і вадзіцеляў, і пешаходаў - а ці варта рызыкаваць на трасах? 

Вось дзве свежыя прапановы - абмежаванне хуткасці да 50 кіламетраў за гадзіну ў населеным пункце і павелічэнне штрафаў за пераход у неналежным месцы. Ксенія Лебедзева ацаніла бяспеку беларускіх дарог.

У Мінску існуюць 8 лакацый, якія і Дзяржаўтаінспекцыя, і будаўнікі гарадскіх дарог называюць месцамі канцэнтрацый аварый - такія болевыя пункты аўтааматараў, куды, калі ўжо трапіш, глядзі ў абодва. Вось гэта выезд з прылеглай тэрыторыі 15-га корпуса БНТУ са з'ездам на МКАД. Участак небяспечны і складаны. Тут зарэгістравана больш як 40 ДТЗ, у 6 выпадках былі пацярпелыя, адно ДТЗ - з удзелам пешахода - спрабаваў перайсці дарогу.

У наступным годзе тут пабудуюць кругавую развязку. Як і на скрыжаванні вуліц Францыска Скарыны і МКАД. Тут аварыі таксама не рэдкасць.

Яшчэ 6 небяспечных участкаў сталіцы: скрыжаванне вуліцы Ваўпшасава з мясцовым праездам МКАД, вуліцы Чкалава на ўчастку ад Варанянскага, скрыжаванне вуліц Багдановіча - Харужай, Лагойскі тракт на ўчастку ад Гамарніка да МКАД, скрыжаванне праспекта Партызанскага - вуліцы Варвашэні - вуліцы Сацыялістычнай, скрыжаванне праспекта Партызанскага - вуліцы Будзёнага. Скрыжаванні  рэканструююць, зробяць больш зразумелымі для вадзіцеляў і пешаходаў, дзесьці пашыраць, дзесьці ўсталююць святлафоры і дадатковыя знакі. 

Маштабныя працы прадоўжацца і на першым транспартным кальцы сталіцы - у снежні пачнецца заключны этап ад праспекта Дзяржынскага да вуліцы Талстога. Пасля адкрыцця гэта дазволіць разгрузіць рух з боку праспектаў Дзяржынскага і Жукава.

Але гэта працуе, калі за тэрыторыяй замацаваная пэўная арганізацыя, зразумела, хто за яе адказвае, хто павінен своечасова рамантаваць. Дрэнна, калі няма гаспадара. І такіх выпадкаў толькі ў сталіцы каля 300. Пабудавалі і забыліся.

Як адзначаюць у Камітэце дзяржкантролю, такія аб'екты ёсць не толькі на ўскраінах, але і ў цэнтры. Прыклад - праезд у раёне гарадскога ўнівермага ЦУМ. Зараз у сістэме ЖКГ шукаюць, за кім замацаваць знайдышаў. Бо самі сябе ямы не залатаюць. І дарэчы, прыняць удзел у паляпшэнні дарожнай інфраструктуры сталіцы можна, пройдучы апытанне на сайце Камітэта дзяржкантролю. 

Мінск сёння самы густанаселены пункт Беларусі – больш як два мільёны жыхароў. Адпаведна, і машын тут больш, дарогі і інфраструктура патрабуюць больш увагі і грошай, і аварый таксама больш - іх амаль столькі ж, колькі ў Магілёўскай і Гродзенскай абласцях разам узятых. 

Юрый Важнік не першы год прасоўвае ініцыятыву актыўнага ўкаранення інтэлектуальнай транспартнай сістэмы, якая падстройваецца пад заторы, адкрываючы зялёны калідор на больш разгружаных кірунках, рэагуе на аварыйныя сітуацыі, прапаноўваючы вадзіцелю знізіць хуткасць або аб'ехаць складаны ўчастак. Аб разумнай дарозе размова ідзе з 2011 года. У 14-ым яе абяцалі ўкараніць. Працэс зацягнуўся - першыя выпрабаванні пачаліся ў 2017 годзе на ўчастку ад вуліцы Казлова да Ціміразева праз праспект Машэрава. Там усталявалі сістэму магнітных датчыкаў, бесправадных аглядных камер і розных відэадэтэктараў. Прапускная здольнасць павялічылася на 12%, на 10 кіламетраў за гадзіну сталі хутчэй ехаць. Такімі ўстройствамі з часам абсталююць да 90 скрыжаванняў па першым і другім гарадскім транспартным кальцы.

Зніжаць або не зніжаць хуткасць да 50 км за гадзіну ў населеным пункце? На думку эксперта, вопыт іншых краін - гэта, вядома, добра, толькі вось спачатку трэба правесці свае даследаванні, што мінус 10 адзінак на спідометры рэальна паўплываюць на бяспеку дарожнага руху і паніжэнне аварыйнасці. Бо за такую змену, хутчэй за ўсё, прыйдзецца заплаціць тым жа аўтамабілістам - дарожным падаткам. 

Выедзем за горад. Праедзем з інспектарам ДПС па адной з самых аварыйных раней дарог Беларусі - Р53. Тут на некаторых участках хуткасць абмежаваная да 70 км за гадзіну - з-за ДТЗ з перавышэннем. Усталяваныя як стацыянарныя, так і мабільныя датчыкі кантролю хуткасці. Менавіта на гэтай дарозе вадзіцелі часта ездзяць па абочыне. Яно і зразумела - вузкая дарога - паспрабуй размінуцца, прыходзіцца ўступаць. Але такая талерантнасць можа згуляць не на вашу карысць.

А вось гэта дарога з паказальнікам на Новае жыццё. І яно сапраўды для кагосьці стала новым. У мінулым тут зафіксавалі 13 ДТЗ з 9 загінуўшымі. Усталявалі тросавую агароджу, стацыянарную камеру, абмежаванні хуткасці. Ёсць участкі на гэтай жа дарозе, дзе такія меры не працуюць. Наезды на пешаходаў нават на пераходзе, з'езд у кювет, перакульванне, спадарожныя сутыкненні, наезды на абочыне. Выратуе толькі рэканструкцыя дарогі.

Тут перасякаюцца дзве рэспубліканскія аўтамабільныя дарогі: Слабада - Навасады і Лагойск - Смалявічы – Мар’іна Горка. Аўтамабільны рух тут вельмі інтэнсіўны, перайсці дарогу бывае вельмі складана. Таму тут плануюць пабудаваць развязку. І альбо падземны, альбо надземны пераход, што спросціць жыццё як пешаходам, так і аўтамабілістам. 

Да першага этапа прыступілі два тыдні таму. У лістападзе пачнуцца асноўныя працы. Дарогу пашыраць у 2 разы - да 14 метраў, зробяць чатырохпалоснай. Дарожнае пакрыццё выканаюць з цаментабетону, а развязкі і мясцовыя праезды - з асфальтабетону. На раздзяляльнай паласе з'явіцца двухбаковая металічная бар'ерная агароджа. Працы плануюць завяршыць на працягу наступнага года.