У гэтых дамах у райцэнтры Буда-Кашалёва Гомельскай вобласці, каб даведацца, якое надвор'е, не трэба ўключаць тэлевізар або адкрываць старонку ў Інтэрнэце. Дажджы або адліга ў жыхароў кватэр выяўляецца ў тым, што вада з дахаў дамоў пачынае заліваць іх кватэры. Стаміўшыся ад шматгадовай перапіскі і абяцанняў аб рамонце, людзі застрахавалі свае кватэры. Зараз грошы на рамонт ім выплачваюць прадстаўнікі страхавых кампаній, а тыя ў сваю чаргу выстаўляюць рахунак прадпрыемству ЖКГ. Вольга Халадовіч падрабязна.
Рамонт у сваёй кватэры Уладзімір Васількоў вымушаны рабіць раз на год. І не таму, што шпалеры выходзяць з моды. Дах іх шматпавярхоўкі не абараняе ад непагадзі, хутчэй, наадварот. Вада па сценах сцякае нават да суседзяў знізу.
Пасля шматгадовай і марнай перапіскі з мясцовым камунальным прадпрыемствам Уладзімір і яго суседзі вырашылі застрахаваць свае кватэры ад чарговага патопу. Урон жыхароў страхавыя кампаніі ацанілі амаль у 60 мільёнаў рублёў.
На гэтым пашпарце аб'екта добра пазначана дата заканчэння капітальнага рамонту - 2015. Гэта значыць, па сутнасці, ён павінен быць ужо завершаны. Насамрэч работы зараз яшчэ ў поўным разгары.
Пакуль спецыялісты ЖКГ праводзяць рамонт, жыхары па-ранейшаму адзначаюць - вада з даху цячэ прама ў кватэру. А гэта значыць, што сума страхавых выплат і выдаткі мясцовага камунальнага прадпрыемства будуць павялічвацца.
